Almatydaǵy úsh adamdy aǵaiyndy eki jigit qaqqan. Kúdiktilerdiń anasy olardyń mundai qadamǵa ózderin qorǵaý úshin barǵanyn alǵa tartady, dep habarlaidy QazAqparat tilshisi.
Kúdiktilerdiń anasy Názira Álikeevanyń aitýynsha, uldary Jandos pen Dinmuhamed kafege týysqandarynyń týǵan kúnine barǵan.
«Men óz uldarymdy bilemin ǵoi. Olar - aqkóńil, adamgershiligi mol balalar. Árine, jas bolǵan soń qyzýqandylyq bolar, biraq ersi qylyq, oǵash minez kórsetken emes. Sol túni olar týǵan kúnge barǵan. Balalaryma 13 erkek ózderi kelip tiisken. Eregestiń sebebi, qyzdar bolýy múmkin, biraq ol týraly anyq aita almaimyn. Desekte, olar ózderin qorǵaǵysy kelgen. Meniń balalarym olardan baqandai 10-15 jas kishi. Uryp soǵýdy solar bastaǵan. Eger qatty zardap shekse, jábirlenýshi bolsa, onda nege politsiiaǵa áli aryz túsirmegen. Men aqiqatyn anyqtaýǵa bar kúshimdi salamyn», - deidi kúdiktilerdiń anasy Nazira Álikeeva.
Onyń sózine qaraǵanda, oqiǵa bolǵan kúni kúdiktilerdiń anasy basqa qalada júrgen.
«Men úide bolmadym. Keshe túnde keldim. Qazir politsiiaǵa baram. Qorǵaýshy jaldaimyn»,- deidi kúdiktilerdiń anasy.
Nazira Álikeevanyń aitýynsha, ol ekinshi ulynyń qaida júrgenin bilmeidi.
Kúdiktilerdiń biri 26 tamyz kúni keshke ustalǵan bolatyn. Ol Almaty oblysy Eńbekshiqazaq aýdanynyń turǵyny, 1995 jyly týǵan A. esimdi azamat. Kúdikti QR Qylmystyq kodeksiniń 128-baby tártibinde ýaqytsha ustaý izoliatoryna qamaldy. Er adam qylmys jasaý kezinde aq tústi Toyota Camry markaly avtokóligin júrgizgen.
Esterińizge salaiyq, 26 tamyzda tańǵy saǵat 5-te Almaty qalasy Bostandyq aýdany Gagarin kóshesinde bolǵan qaqtyǵystan keiin bir taraptyń ókilderi óz qarsylastaryn avtomobilmen qaǵyp, qylmys ornynan boi tasalaǵan. Video áleýmettik jelide tarady.
