الماتىداعى ٷش ادامدى اعايىندى ەكٸ جٸگٸت قاققان. كٷدٸكتٸلەردٸڭ اناسى ولاردىڭ مۇنداي قادامعا ٶزدەرٸن قورعاۋ ٷشٸن بارعانىن العا تارتادى, دەپ حابارلايدى قازاقپارات تٸلشٸسٸ.
كٷدٸكتٸلەردٸڭ اناسى نەزيرا ەلٸكەەۆانىڭ ايتۋىنشا, ۇلدارى جاندوس پەن دٸنمۇحامەد كافەگە تۋىسقاندارىنىڭ تۋعان كٷنٸنە بارعان.
«مەن ٶز ۇلدارىمدى بٸلەمٸن عوي. ولار - اقكٶڭٸل, ادامگەرشٸلٸگٸ مول بالالار. ەرينە, جاس بولعان سوڭ قىزۋقاندىلىق بولار, بٸراق ەرسٸ قىلىق, وعاش مٸنەز كٶرسەتكەن ەمەس. سول تٷنٸ ولار تۋعان كٷنگە بارعان. بالالارىما 13 ەركەك ٶزدەرٸ كەلٸپ تيٸسكەن. ەرەگەستٸڭ سەبەبٸ, قىزدار بولۋى مٷمكٸن, بٸراق ول تۋرالى انىق ايتا المايمىن. دەسەكتە, ولار ٶزدەرٸن قورعاعىسى كەلگەن. مەنٸڭ بالالارىم ولاردان باقانداي 10-15 جاس كٸشٸ. ۇرىپ سوعۋدى سولار باستاعان. ەگەر قاتتى زارداپ شەكسە, جەبٸرلەنۋشٸ بولسا, وندا نەگە پوليتسيياعا ەلٸ ارىز تٷسٸرمەگەن. مەن اقيقاتىن انىقتاۋعا بار كٷشٸمدٸ سالامىن», - دەيدٸ كٷدٸكتٸلەردٸڭ اناسى نازيرا ەلٸكەەۆا.
ونىڭ سٶزٸنە قاراعاندا, وقيعا بولعان كٷنٸ كٷدٸكتٸلەردٸڭ اناسى باسقا قالادا جٷرگەن.
«مەن ٷيدە بولمادىم. كەشە تٷندە كەلدٸم. قازٸر پوليتسيياعا بارام. قورعاۋشى جالدايمىن»,- دەيدٸ كٷدٸكتٸلەردٸڭ اناسى.
نازيرا ەلٸكەەۆانىڭ ايتۋىنشا, ول ەكٸنشٸ ۇلىنىڭ قايدا جٷرگەنٸن بٸلمەيدٸ.
كٷدٸكتٸلەردٸڭ بٸرٸ 26 تامىز كٷنٸ كەشكە ۇستالعان بولاتىن. ول الماتى وبلىسى ەڭبەكشٸقازاق اۋدانىنىڭ تۇرعىنى, 1995 جىلى تۋعان ا. ەسٸمدٸ ازامات. كٷدٸكتٸ قر قىلمىستىق كودەكسٸنٸڭ 128-بابى تەرتٸبٸندە ۋاقىتشا ۇستاۋ يزولياتورىنا قامالدى. ەر ادام قىلمىس جاساۋ كەزٸندە اق تٷستٸ Toyota Camry ماركالى اۆتوكٶلٸگٸن جٷرگٸزگەن.
ەستەرٸڭٸزگە سالايىق, 26 تامىزدا تاڭعى ساعات 5-تە الماتى قالاسى بوستاندىق اۋدانى گاگارين كٶشەسٸندە بولعان قاقتىعىستان كەيٸن بٸر تاراپتىڭ ٶكٸلدەرٸ ٶز قارسىلاستارىن اۆتوموبيلمەن قاعىپ, قىلمىس ورنىنان بوي تاسالاعان. ۆيدەو ەلەۋمەتتٸك جەلٸدە تارادى.
