Almaty qalasy ákiminiń orynbasary Muhit Ázirbaev «Zerdeli–6» shaǵyn aýdanynda qisaiǵan kópqabatty úidiń turǵyndarymen kezdesti, - dep habarlaidy "Ult aqparat".
«Zerdeli–6» shaǵyn aýdanyndaǵy №179 úidiń turǵyndarymen ótken kezekti kezdesý barysynda QazQSǴZI-nyń zertteý nátijeleri jariia etildi.
2019 jyldyń sońǵy ailarynda bastalǵan úidiń negizi men tirek konstrýktsiialaryn júieli túrde zertteý, ǵimarattyń kún saiynǵy qisaiýyn ólsheý jáne onyń múmkin bolatyn serpinin qadaǵalaý QazQSǴZI zerthanasynyń mamandaryna osy úide turý qaýipsizdigine qatysty aldyn ala qorytyndy berýge múmkindik berdi. Mamandardyń málimeti boiynsha, qalpyna keltirý jumystary aiaqtalǵannan keiin úi odan ári paidalanýǵa jaramdy bolady.
Osy jyldyń aqpan aiynda QazQSǴZI AQ-nyń qorytyndysy men usynymy negizinde qurylys-montaj jumystaryn bastaý josparlanyp otyr. Onda qarama-qarsy jaǵynan topyraqty alý arqyly úidiń qisaiýyn joiý boiynsha jumystar júrgizilmek. Odan ári úidiń irgetas taqtasyna bailanystyra otyryp, úi perimetri boiynsha býrabivti qadalar ornatý arqyly úidi tiktep nyǵaitý boiynsha jumystar júrgiziledi. Odan keiin sý burý júiesiniń qurylǵysymen qalpyna keltirý jumystary qolǵa alynady.
«Qazir usynystar boiynsha QazQSǴZI-men kelise otyryp, jumys óndirisiniń jobasy ázirlenbek. Ǵimarattyń irgetasyn kúsheitý, qisaiýdyń aldyn alý jáne joiý jónindegi odan arǵy barlyq jumystar QazQSǴZI-diń qurylys salasyndaǵy, onyń ishinde seismikalyq qaýipti aimaqtardaǵy problemalarmen ainalysatyn Qazaqstandaǵy jalǵyz memlekettik mekemeniń baqylaýymen júrgiziletin bolady. Institýttyń bul salada 87 jyldyq tájiribesi bar», — dep atap ótti Almaty qalasynyń jaily qalalyq orta basqarmasynyń basshysy Qýandyq Aitmaǵanbetov.
Mamandardyń pikirinshe, qisaiǵan úidiń barlyq problemalaryn túpkilikti sheshilýine kóz jetkizbeiinshe, bul jumystar úsh aiǵa deiin sozylýy múmkin. Sonymen qatar, Zerdeli yqsham aýdanyndaǵy barlyq 32 úi boiynsha zertteý júrgizilip, QazǴZI-diń usynymdary shyqpaq.
Qazirgi ýaqytta barlyq turǵyndar qala ákimshiligi esebinen jalǵa beriletin turǵyn úimen qamtamasyz etilgen. Adamdarǵa balalaryn balabaqshalar men basqa da bilim berý mekemelerine ornalastyrýǵa kómek kórsetilýde.
Osy ýaqyt aralyǵynda turǵyndar arasynda týyndaǵan barlyq máselelerdi sheshý úshin arnaiy shtab qurylyp, jumys isteýde.
