© Photo: Pexels / Tima Miroshnichenko
Almatyda bolǵan fitnes jattyqtyrýshy ólimine qatysy bar kúdikti Bishkekte ustaldy. Bul týraly Qyrǵyz Respýblikasynyń Ishki ister ministrligi málim etti, dep habarlaidy Sputnik Qazaqstan "Kabar" agenttigine silteme jasap.
Bishkektegi jekemenshik qonaqúilerdiń birinen 1992 jyly týǵan "A.B."esimdi kúdikti ustaldy. Oǵan Qazaqstannyń quqyq qorǵaý organdary QR Qylmystyq kodeksiniń 99-baby "Toptyq kisi óltirý" boiynsha izdeý jariialaǵan.
Alynǵan aqparatqa sáikes, kúdikti óz áreketi úshin qylmystyq jaýapkershilikten jaltarý maqsatynda shekarany zańsyz kesip ótip, Bishkek qalasynyń aýmaǵynda jasyrynǵan.
"Qazaqstandyq áriptester Qyrǵyz Respýblikasy Ishki ister ministrliginiń qylmystyq izdestirý bas basqarmasyna tergeý organdarynan jasyrynyp júrgen adamdy izdestirý jáne ustaýǵa kómektesý týraly ótinishpen júgingen bolatyn", - delingen habarlamada.
Kúdiktiniń tanymal klýbtyń 28 jastaǵy fitnes jattyqtyrýshysyn atyp óltirýge qatysy bar ekeni anyqtaldy.
Almaty qalasy Naýryzbai aýdandyq politsiia bólimi 31 jastaǵy kúdiktige izdeý jariialap, Almaty qalasynyń mamandandyrylǵan aýdanaralyq tergeý soty syrttai qamaýǵa alýǵa sanktsiia shyǵarǵan.
Kúdiktiniń buǵan deiin de aýyr qylmys jasaǵany úshin jaýapqa tartylǵany belgili boldy. Qazirgi ýaqytta ustalǵan Qazaqstan azamaty ýaqytsha tergeý izoliatoryna qamaldy.
Eske salsaq, 19 shilde kúni Almatyda fitnes jattyqtyrýshysy Damir Tórebaevty óz páterinde atyp ketken.
