Almatyda saýda ortalyǵynda ornalasqan bankke kúmándi paket qaldyryp ketken er adam ustaldy, dep habarlaidy "Ult aqparat".
Medeý aýdandyq politsiia basqarmasynyń habarlaýynsha, pakettiń iesi Almaty qalasynyń 22 jastaǵy turǵyny bolyp shyqty.
«Ustalǵan azamat pakettiń ózine tiesili ekenin birden rastady. Onyń aitýynsha, qurylǵylardy ósimdik ósirý ádisterin jetildirý úshin qoldanyp júrgen. Ol turmystyq buiymdar salǵan paketin bank bólimshesinde umytyp ketken eken. Azamat A.-nyń keltirgen dáiekteri mindetti túrde qaita tekseriledi. Atalmysh fakti QR Qylmystyq kodeksiniń 293-babynyń 1-bóligi boiynsha sotqa deiingi biryńǵai tergeý tizilimine engizildi»,– dedi Medeý aýdandyq politsiia basqarmasynyń bastyǵy Bolat Totybaev.
Eske salaiyq, Nazarbaev dańǵylynda ornalasqan saýda ortalyǵyna kelýshiler kúdikti paketke bailanysty evakýatsiialanǵan bolatyn.
Al 10 aqpan kúni Almaty halyqaralyq áýejaiynan adamdar evakýatsiialanǵan edi. Oǵan sebep «102» nómirine jarylǵysh zat qoiylǵandyǵy týraly habardyń túsýi. Ǵimarat qorshaýǵa alynyp, tekserý jumystary júrgizildi. Aqparat rastalǵan joq. Politseiler jalǵan habar berdi degen kúdikpen 23 jastaǵy jigitti ustady. Ol qalalyq psihonevrologiialyq dispanserde esepte turady.
