Almatyda mas júrgizýshi blokposty soǵyp ótip, saldarynan eki politsiia qyzmetkeri kóz jumdy, – dep habarlaidy Almaty qalalyq PD baspasóz qyzmeti.
«Saǵat 05:26-da Almaty oblysy Qarasai aýdany Kóksai shaǵyn aýdanynda «BMW» markaly avtokóliginiń júrgizýshisi, 1992 jyly týǵan A. esimdi azamat Qojabekov kóshesimen júrip, Jańa ǵasyr kóshesi qiylysyndaǵy №4 blokposty buzyp ótken. Ol aldymen beton qorshaýǵa soǵylyp, sodan keiin inertsiiamen ishinde eki politsiia qyzmetkeri otyrǵan patrýl kóligine soqtyǵysqan», - delingen habarlamada.
Ókinishke qarai, apat saldarynan politsiia aǵa leitenanty 1978 jyly týǵan Jalǵas Janǵaziev alǵan aýyr jaraqatynan jedel járdem kóligi kelgenge deiin kóz jumdy. Onyń áriptesi, politsiia serjanty 1994 jyly týǵan Dastan Ábdiqanov aýrýhanada esin jimastan qaitys boldy.
Jaras Sultanǵazyuly Janǵaziev 1978 jyly Batys Qazaqstan oblysynda týǵan. Tájirbieli maman. Quqyq qorǵaý organdarynda 2001 jyldan bastap qyzmet etken. Artynda jary men eki qyzy qaldy.
Dastan Maratjanuly Ábdiqanov 1994 jyly Almaty qalasynda týǵan. Ol politsiiada 2016 jyldan beri qyzmet etken. Úilengen, bir qyz tárbielep otyrǵan. Kishkentaiy áli qyrqynan da shyqpaǵan.
Almaty ákimi Baqytjan Saǵyntaev óz mindetterin oryndaý barysynda qaza tapqan politsiia qyzmetkerleriniń otbasylary men jaqyndaryna kóńil aitty.
«Blokposta mindetterin atqarǵan jáne JKO saldarynan qaza bolǵan politsiia qyzmetkerleri Jaras Janǵaziev pen Dastan Ábdiqanovtyń otbasylary men jaqyndaryna qatty qaiǵyryp kóńil aitamyn», - dep jazdy Twitter-de Baqytjan Saǵyntaev.
Qaitys bolǵandardyń otbasylaryna jan-jaqty qoldaý kórsetiletin bolady.
