Premer-ministrdiń orynbasary, Almatydaǵy ushaq apaty boiynsha úkimettik komissiia múshesi Roman Skliar Almatydaǵy Bek Air ushaǵynyń qalai apatqa ushyraǵanyn aityp berdi, dep habarlaidy QazAqparat.
«Ushaq apatynan kóz jumǵandardyń týǵan-týystaryna qaiǵyra kóńil aitamyz. Bul jaǵdaiǵa qatysty eshkim de memlekettiń qoldaý sharalarynan tys qalmaidy. Qaitys bolǵandardyń týǵan-týystary men zardap shekkenderde qajetti barlyq kómek pen qoldaý kórsetiledi. Oqiǵa tirkelgennen bastap úkimettik komissiia tiisti jumysty bastap ketti. Búgin biz ushý-qoný jolaǵyna áýe kemesiniń artqy bóliginiń birizdi sipatta eki ret janasqanyn anyqtadyq. Jolaqqa janasý aralyǵy 300-400 metr shamasynda boldy. Ushar kezde áýe kemesi eki ret ushý-qoný jolaǵyna soqtyqqan», - dedi Roman Skliar Almatyda shuǵyl ótken baspasóz máslihatynda.
Úkimet basshysy orynbasarynyń aitýyna qaraǵanda, ushý-qoný jolaǵy aiaqtalǵannan keiin áýe kemesi ońǵa burylǵan. Shassi bul ýaqytta jinaqtalyp qoiǵan.
«Ushaq ushyp ketpek bolǵanymen oń jaqqa aýyp ketip, jeke úidiń qorshaýyna soǵylǵan. Úide eshkim bolmaǵan. Áýe kemesi soqtyǵys saldarynan ekige bólinip ketken. Negizinen ushaqtyń aldyńǵy jaǵynda otyrǵan jolaýshylar kóz jumǵan», - dedi Roman Skliar.
