پرەمەر-مينيستردٸڭ ورىنباسارى, الماتىداعى ۇشاق اپاتى بويىنشا ٷكٸمەتتٸك كوميسسييا مٷشەسٸ رومان سكليار الماتىداعى Bek Air ۇشاعىنىڭ قالاي اپاتقا ۇشىراعانىن ايتىپ بەردٸ, دەپ حابارلايدى قازاقپارات.
«ۇشاق اپاتىنان كٶز جۇمعانداردىڭ تۋعان-تۋىستارىنا قايعىرا كٶڭٸل ايتامىز. بۇل جاعدايعا قاتىستى ەشكٸم دە مەملەكەتتٸڭ قولداۋ شارالارىنان تىس قالمايدى. قايتىس بولعانداردىڭ تۋعان-تۋىستارى مەن زارداپ شەككەندەردە قاجەتتٸ بارلىق كٶمەك پەن قولداۋ كٶرسەتٸلەدٸ. وقيعا تٸركەلگەننەن باستاپ ٷكٸمەتتٸك كوميسسييا تيٸستٸ جۇمىستى باستاپ كەتتٸ. بٷگٸن بٸز ۇشۋ-قونۋ جولاعىنا ەۋە كەمەسٸنٸڭ ارتقى بٶلٸگٸنٸڭ بٸرٸزدٸ سيپاتتا ەكٸ رەت جاناسقانىن انىقتادىق. جولاققا جاناسۋ ارالىعى 300-400 مەتر شاماسىندا بولدى. ۇشار كەزدە ەۋە كەمەسٸ ەكٸ رەت ۇشۋ-قونۋ جولاعىنا سوقتىققان», - دەدٸ رومان سكليار الماتىدا شۇعىل ٶتكەن باسپاسٶز مەسليحاتىندا.
ٷكٸمەت باسشىسى ورىنباسارىنىڭ ايتۋىنا قاراعاندا, ۇشۋ-قونۋ جولاعى اياقتالعاننان كەيٸن ەۋە كەمەسٸ وڭعا بۇرىلعان. شاسسي بۇل ۋاقىتتا جيناقتالىپ قويعان.
«ۇشاق ۇشىپ كەتپەك بولعانىمەن وڭ جاققا اۋىپ كەتٸپ, جەكە ٷيدٸڭ قورشاۋىنا سوعىلعان. ٷيدە ەشكٸم بولماعان. ەۋە كەمەسٸ سوقتىعىس سالدارىنان ەكٸگە بٶلٸنٸپ كەتكەن. نەگٸزٸنەن ۇشاقتىڭ الدىڭعى جاعىندا وتىرعان جولاۋشىلار كٶز جۇمعان», - دەدٸ رومان سكليار.
