Almatyda balalar úiiniń direktory men áleýmettik pedagog sottaldy, dep habarlaidy "Ult aqparat" Qarjylyq monitoring agenttigine silteme jasap.
Agenttiktiń habarlaýynsha, Almaty qalasy boiynsha aýmaqtyq departamenti «QAMQOR» jedel aldyn alý is-sharasy aiasynda Almaty oblysy bilim basqarmasynyń «№1 Almaty oblystyq balalar úii» QMM direktory men qyzmetkerine qatysty sotqa deiingi tergep-tekserýdi aiaqtady.
Tergeý barysynda balalar úiiniń áleýmettik pedagogy M. Mustafina óziniń qyzmettik jaǵdaiyn paidalanyp, ózine senip tapsyrylǵan 67 million teńge somasyndaǵy aqshalai járdemaqyny jymqyrǵany dáleldendi.
Sottalǵan Mustafina áleýmettik pedagog jáne balalar úiiniń basshysynan qamqorshynyń múddelerin bildirýge senimhaty bola otyryp, tárbielenýshilerge asyraýshysynan airylýy jáne múgedektigi boiynsha járdemaqy resimdep, sondai-aq ekinshi deńgeidegi bankterde olarǵa kartochkalyq shottar ashqan.
Tárbielenýshilerdiń esep aiyrysý shottaryna tolyq qol jetkizip, mobildi banking arqyly balalar úii tárbielenýshileriniń esep aiyrysý shottarynan jeke kartochkalyq shotqa aqsha qarajatyn aýdarymdardy júzege asyrǵan, sondai-aq tárbielenýshilerdiń bank kartalaryn paidalana otyryp, bankomattardan keibir qarajatty alǵan.
Mundai zańsyz qyzmetpen sottalǵan adam 2015 jyldyń jeltoqsanynan 2020 jyldyń tamyzyna deiin ainalysqan.
Óz kezeginde balalar úiiniń direktory Ǵ. Qondybaeva 2018 jyldyń kúzinde Mustafinanyń urlaý faktileri týraly bilip, ony ýákiletti organdardan jasyryp, ony qyzmetinen shettetpei jáne balalar úii tárbielenýshileriniń shottaryna qol jetkizýin shektemegen.
Sottalýshylar óz kinásin moiyndady. Qazirgi ýaqytta 10 million teńgeden astam shyǵyn balalar úii tárbielenýshileriniń paidasyna óteldi.
Sot 52,4 million teńge kólemindegi qalǵan somany jábirlenýshilerge qaitarýdy mindettedi.
Sot úkimimen M. Mustafina QR QK 189-baby (Asa iri mólsherde senip tapsyrylǵan bóten múlikti iemdený nemese ysyrap etý) boiynsha kináli dep tanylyp, 7 jyl bas bostandyǵynan jáne 10 jyl merzimge pedagogikalyq qyzmetpen ainalysý quqyǵynan aiyrý túrinde jaza taǵaiyndaldy.
G. Qondybaeva QR QK 371-baby (salǵyrttyq) boiynsha kináli dep tanyldy. Memlekettik laýazymda qyzmet atqarý quqyǵynan aiyra otyryp, oǵan 2,7 million teńge somasynda aiyppul taǵaiyndaldy.
