Áleýmettik jelilerde balabaqshada balalardyń top ishindegi bir búldirshindi jabylyp uryp jatqany týraly video tarady.
«Bizdiń ulymyzdy balalar aiaýsyz soqqyǵa jyqqan. Uryp-soǵý shamamen 5 minýtqa sozyldy. Tárbieshi joq, óz sharýasymen shyǵyp ketken. Balamyzdyń miy shaiqalǵan, aýrýhanaǵa jattyq. Kishkentai balalar da osyndai qatygez bolǵany ma?», - dep jazady zardap shekken balanyń ata-anasy.
Qalalyq bilim basqarmasy jaǵdai «№51 bóbekjai-baqsha» balabaqshasynda bolǵanyn málim etti.
Alynǵan túsindirme hatqa sáikes, tárbieshi bul ýaqytta balalarǵa túski as alyp kelý úshin shyǵyp ketken. Sol sebepti, balalardyń tártibin qadaǵalai almaǵan.
«Balabaqsha ákimshiliginiń buiryǵymen tárbieshi qatań sógis aldy. Sonymen qatar balabaqsha meńgerýshisine de tártiptik jaza qoldanyldy», - dep habarlady Almaty qalalyq bilim basqarmasynan.
Keiin belgili bolǵandai, osy iske bailanysty tergeý bastaldy. Bul týraly QR Oqý-aǵartý ministrliginiń Balalardyń quqyqtaryn qorǵaý komiteti habarlady.
«Balalardyń quqyqtaryn qorǵaý komiteti zardap shekken balanyń anasymen bailanysqa shyqty. Qazir balaǵa barynsha meditsinalyq kómek kórsetilip jatyr. Sondai-aq, tergeý amaldary júrgizilýde. Atalǵan másele Komitet baqylaýynda»,-delingen habarlamada.
