Almatydaǵy Ulttyq kitaphanada Jambyl Jabaevtyń 175 jyldyǵyna arnalǵan «Jyr alyby – Jambyl» atty mýzykalyq-poeziialyq kesh ótti, dep habarlaidy "Ult aqparat".
Is-shara QR Ulttyq kitaphanasynyń óner bólimi janyndaǵy «Injý-marjan» klýby aiasynda ótkiziledi.
Mýzykalyq-poeziialyq keshtiń maqsaty – aqynnyń poeziialyq murasyn jańǵyrtý, onyń shyǵarmashylyǵyn keńinen nasihattaý jáne dáripteý, onymen jastardy tanystyrý.
Sharaǵa belgili qoǵam qairatkerleri, jazýshylar, jambyltanýshy men tanymal kompozitorlar qatysty. Atap aitsaq, Naǵashybek Qapalbekuly, Temirhan Tebegenov, Saltanat Aibergenova, Balnur Qydyrbek, Shaiahmet Aljambaev, Habibolla Setekov, Baqytjan Shormaqov jáne taǵy basqalary.
Mýzykalyq-poeziialyq kesh aiasynda kitaphananyń Oraz Jandosov atyndaǵy «Qazaqstan kitaptary» jáne merzimdi basylymdar zalynda uly aqyn, sýyryp salma óneriniń klassigi Jambyl Jabaevtyń 175 jyldyǵyna arnalǵan kitap kórmesi uiymdastyryldy. Onda aqyn shyǵarmalary men ol týraly ádebietter usynyldy.
«Qazaq poeziiasynyń kóp ǵasyrlyq tarihyndaǵy jyraý, poeziia alyby Jambyl Jabaevtyń týǵanyna 175 jyl toldy. Búginde memlekettik deńgeidi halyqaralyq sipaty bar úlken is-sharalar bastaldy. Sonyń bir jarqyn kórinisi Ulttyq kitaphanasyndaǵy sharany aitýǵa bolady. Munda arnaiy kórme men ǵalymdardyń konferentsiiasy uiymdastyryldy. Bul halqymyzdyń rýhani qundylyqtaryn ulyqtaýdyń úlken kórinisi»,- deidi Qazaqstan Jazýshylar odaǵynyń múshesi Temirhan Tebegenov.
Sondai-aq, búgin QR Memlekettik hatshysy Qyrymbek Kósherbaev, Mádeniet jáne sport ministri Aqtoty Raiymqulova, Nur-Sultan qalasynyń ákimi Altai Kólginov, aqyn-jazýshylar, jambyltanýshylar jáne qoǵam qairatkerleri Elorda da Jambyl Jabaevtyń eskertkishine gúl shoǵyn qoidy.
Aita keteiik, keshe Jambyl Jabaevtyń 175 jyldyq mereitoiyn daiyndaý jáne ótkizý jónindegi memlekettik komissiianyń alǵashqy otyrysy ótti.
Mereitoilyq jyl ishinde respýblika boiynsha 500-ge jýyq áleýmettik, imidjdik, ǵylymi, tanymdyq is-sharalar ótkiziledi. Budan bólek, aqyn ómirinen derekti film túsirý, óleńderiniń jańa jinaqtaryn shyǵarý, aitystar men ádebi konkýrstardy, kitap kórmelerin uiymdastyrý, mereitoilyq moneta, poshta markasyn ázirleý jáne basqa da sharalar ótkizý kózdelip otyr.
