Almatyda órt sóndirý quralymen kóshede eldi shoshytqan bloger ákimshilik qamaýǵa alyndy, dep habarlaidy QazAqparat.
Bir top jigit buǵan deiin Almaty metrosynda prank túsirgeni úshin jazaǵa tartylǵan bolatyn. Tártipti qaita buzǵan tiktokerler bul joly ákimshilik jazamen qamaýǵa alyndy.
«1999 jyly týǵan K.S.Áliaqbarov, 2002 jyly týǵan A.S.Armiianov jáne operatordyń (qazirgi ýaqytta jeke basy anyqtalyp jatyr) is-áreketteri QR ÁQbK-niń 434 baby – usaq buzaqylyq boiynsha kvalifikatsiialandy. Armiianov aldynda metroda áýendik kolonkamen jasalǵan prankterge qatysqan jáne osyǵan deiin QR ÁQbK-niń 434-baby boiynsha ákimshilik jaýapkershilikke tartylǵan. Bul áreketter aiyppuldy nemese ákimshilik qamaýǵa alýdy kózdeidi. Jinaqtalǵan ákimshilik is júrgizý materialy sheshim qabyldaý úshin sotqa joldandy», - dedi Almaty qalalyq Politsiia departamenti bastyǵynyń orynbasary Rústem Ábdirahmanov.
Politsiia ókiliniń aitýynsha, mamandandyrylǵan aýdanaralyq ákimshilik sotynyń qaýlysymen K.S.Áliaqbarov (beinetaspada qolynda órt sóndirgishi bar) ákimshilik qamaýǵa alý túrindegi jaýapkershilikke tartyldy. A.S.Armiianovqa jáne operatorǵa qatysty tekserý jalǵasýda.
Aita keteiik, olar osyǵan deiin Almaty metrosynda úlken kolonkamen mýzyka daýysyn qatty qoiyp, prank jasaǵany úshin jaýapqa tartylǵan bolatyn.
