Almatyda №7 qalalyq klinikalyq aýrýhananyń qabyldaý bólimshesiniń dárigerleri meditsinalyq kómekke júgingen júkti áieldi bosandyryp aldy, dúniege ul bala keldi, dep habarlaidy QazAqparat.
Baspasóz qyzmetiniń málimetinshe, Almaty oblysynyń 23 jastaǵy turǵyny tolǵaǵynyń bastalýyna bailanysty Almaty qalasynyń №7 qalalyq klinikalyq aýrýhanasyna kómekke júgingen.
Oǵan shuǵyl túrde qabyldaý bólimshesinde qajetti minimaldy tekserý júrgizildi.
Dárigerler analiz alyp, ýzige túsirdi. Periferiialyq kateter ornatty.
20 minýttan keiin Qazaqstan Respýblikasynyń taǵy bir azamaty dúniege keldi.
Bosanýdy statsionar ginekologtarynyń kezekshi brigadasy qabyldady.
Áieldi bosandyrýdyń barlyq protsesin klinika reanimatologtary júrgizdi.
«Júkitilik merzimi - 38 apta, bosandyrý shuǵyl túrde boldy. Júkti áiel turǵylyqty mekenjaiynan jyraqta bolýyna bailanysty bizdiń aýrýhanaǵa meditsinalyq kómekke júgingen. Bul - onyń ekinshi balasy. Ai-kúni tolyq jetken. Áriptesim, doktor Shahlo Abdýjabarova ekeýmiz qabyldaý bólimshesiniń reanimatsiia zalynda bosandyrdyq. Protsess asqynýsyz birqalypty ótti. Ananyń da, balanyń da jaǵdaiy jaqsy. Bala jaryq dúnie esigin ashty. Bul - baqyt!», - deidi áieldi bosandyryp alǵan №1 ginekologiia bólimshesiniń meńgerýshisi Gúlmira Jamaeva.
Qazirgi ýaqytta ana men balany jedel meditsinalyq kómek jáne neonataldy brigada mamandandyrylǵan meditsinalyq uiymǵa jetkizdi.
«Sonymen qatar, búginde jetinshi qalalyq aýrýhananyń barlyq meditsinalyq qyzmetkerleri erekshe jaǵymdy sezimderdi sezinedi, óitkeni munda balalar kún saiyn dúniege kelmeidi, óitkeni bul perzenthana emes. Jáne ózderiniń áriptesterin maqtan tutady. Búgin olar dárigerlik korporativtik chatta áriptesterin sátti ótken bosandyrýmen quttyqtap, anasyna tezirek saýyǵyp ketýin jáne balaǵa «Baýy berik bolsyn» tiledi. Olar tipti balany ózara Qalqaman dep ataý kerek dep qaljyńdady»,- dep atap ótti aýrýhananyń baspasóz qyzmeti.
