Almatyda jiti respiratorlyq virýstyq infektsiia juqtyrǵandar sany kúrt ósti. Bir aptada 12 myńnan astam jaǵdai tirkeldi. Bul týraly Baqytjan Saǵyntaev «Almaty» telearnasyndaǵy tikelei efirde aitty, dep habarlaidy QazAqparat.
Onyń aitýynsha, qalada JRVI-men syrqattanýshylyqtyń maýsymdyq ósýi baiqalady. Ótken aptada Almaty dárigerleri 12479 jaǵdaidy tirkedi.
«Ótken jylmen salystyrǵanda, qazir JRVI-men aýyratyndar 3,7 ese kóp. Sonymen qatar, bul kórsetkish apta saiyn ósip otyr. Jańa epidemiologiialyq maýsym bastalǵannan bastap 1 qazan men 17 qarasha aralyǵynda JRVI-diń 73 731 jaǵdaiy tirkeldi. Sonymen qatar, AH3N2 tumaýy 13 adamnan anyqtaldy»,- deidi ol.
Almaty ákimi JRVI, tumaý jáne pnevmoniianyń taralýyna bailanysty kúrdeli jaǵdaidy eskerý kerektigin tilge tiek etti. Ol Almatynyń barlyq turǵyndaryn buryn engizilgen aldyn alý sharalaryn, sonyń ishinde maska taǵýdy qatań saqtaýǵa shaqyrdy.
Al, koronavirýs infektsiiasy men tumaýǵa qarsy vaktsinalanbaǵan adamdar ózderin jáne jaqyndaryn qorǵaý úshin ekpe alýlary tiis. Megapoliste bul úshin barlyq jaǵdai jasalǵan. Vaktsinalaý halyqty tumaý virýsyn juqtyrýdan qorǵap qana qoimai, derttiń asqynýyna jol bermeidi ári ólim-jitimdi edáýir tómendetýge kómektesedi. Biyl reseilik óndiristiń «Grippol Pliýs» tumaýǵa qarsy úshvalentti vaktsinasy 130 000 doza kóleminde satyp alyndy.
