Almatyda birneshe jylǵa sozylǵan jóndeý jumystarynan soń Voznesensk kafedraldy shirkeýi qaita ashyldy, dep habarlaidy QazAqparat tilshisi.
Bir ǵasyrlyq tarihy bar ǵimaratty qaita qalpyna keltirýge 2 mlrd teńge qarajat ketti. Bul qarjyny qarapaiym halyq pen biznes qaýymdastyq jinap berdi.
Restavratsiialyq jumystar 2017 jyldyń jazynda bastaldy.
Shirkeýdi duǵa oqyp, litýrgiia rásimin jasaýǵa Astana jáne Qazaqstan mitropoliti Aleksandr, Shyǵysamerikalyq jáne Niý-Iorktik Illarion keldi.
«Shirkeýdiń ashylýy - biz úshin mańyzdy oqiǵa. Dáripteý rásimi shirkeýdiń qaitadan halyqqa esik ashyp, ǵibadat bastalǵanyn bildiredi. Bolashaqta bul jerde hristian qyzmeti júrsin dep búgin arnaiy duǵa oqylyp jatyr», - deidi protoierei, Qazaqstan mitropolit okrýginiń shirkeý men qoǵam qarym-qatynasy bóliminiń tóraǵasy Aleksandr Sývorov.
Onyń aitýynsha, shirkeýdiń ishi avtordyń qalaýymen ózgertildi.
«Tarihi qujattardy zerttep shyqtyq. Óte aýqymdy joba boldy. Boiaýlardyń túsine deiin qaraldy. Buǵan deiin de bul shirkeýge restavratsiia jasalǵan. Alaida bul joly avtorlardyń ideiasy tolyǵymen júzege asty dep oilaimyn», - dedi ol.
Shirkeýdi qaita jóndeýge Resei, Frantsiia, Germaniia sýretshileri atsalysty.
Mamandar kóne sáýletshilerdiń ideiasyna nuqsan keltirmei, úzdik tehnologiialardy qoldandy.
«Tehnikalyq problemalar kóp boldy. Qazaqstanda ondai kúrdeli máseleni sheshetin maman tappadyq. Berlinnen maman aldyrdyq. Ǵimarattyń aldyńǵy jaǵyndaǵy munaralaryn aýystyrý eń qiyn problema boldy. Bul jumystarǵa tas qashaýshy, sýretshi, aǵash sheberi, jalpy alǵanda 2 myńǵa jýyq adam qatysty», - dedi Aleksandr.
Protoierei Aleksandr Sývorov shirkeýdiń landshaft dizainynyń taqyrypqa sai bolýyna basa mán berilgenin aitty.
«Shirkeýdi salar kezde bul saiabaq Pýshkinskii dep atalǵan bolatyn. Sondyqtan, Sankt-Peterbordan Pýshkin stilindegi arnaiy shamdar aldyryldy. Ainalaǵa kespetas tóseldi», - dedi ol.
Búgingi shirkeýdiń ashylýyna hristian dininiń pravoslav baǵytyn ustanatyn adamdar jinaldy.
Almatydaǵy Voznesensk shirkeýi – aǵashtan soǵylǵan álemdegi eń biik pravoslav shirkeýiniń biri. Konstrýktsiiasynyń biiktigi 54 metrge jetetin bul ǵimaratty 1904-1907 jyldary Andrei Zenkov salǵan. Tutas aǵash bólshekterden jasalǵan shirkeý 1910 jylǵy jer silkinisinen soń qiramai aman qaldy. Munda bir ýaqytta 1800 adam qulshylyq jasai alady.
