Almatyda joldyń qarsy betine shyqqan kólik júrgizýshi jazalandy, dep habarlaidy "Ult aqparat".
Almatyda jol erejesin qasaqana buzǵan er adam anyqtaldy. Bul –1997 jyly týǵan T. esimdi azamat. Almaty oblysynyń turǵyny.
Jol júrý erejesin óreskel buzǵan júrgizýshi bes táýlikke qamaýǵa alyndy. Sonymen qatar, 155 myń teńge kóleminde aiyppul tóleidi.
«Quqyq buzýshynyń jolaýshysy túsirgen kadrlarda barlyǵy anyq kórsetilgen. Árine, jolda mundai is-áreketke jol berilmeidi. Qarbalas kóshe boiymen qarsy jolaqqa shyǵýmen qatar, júrgizýshi baǵdarshamnyń tyiym salynǵan dabylyna ótip ketken, saqtandyrý polisi joq, avtokóliktiń áinekteri qarańǵylanǵan, apattyq jaǵdai týǵyzyp, tirkeýden sheshilgen kólik quralyn basqarǵan. Sonymen qatar, júrgizýshiniń áreketi usaq buzaqylyq retinde qarastyrylady. Almaty qalasynyń mamandandyrylǵan aýdanaralyq ákimshilik sotynyń sheshimimen quqyq buzýshy bes táýlikke qamaýǵa alyndy. Aiyppuldyń jalpy somasy 155 myń teńge. 11 ákimshilik hattama toltyryldy, – dedi Almaty qalalyq PD jergilikti politsiia qyzmeti basqarmasynyń bastyǵy Manap Sattarov.
