Almaty ákimi Baqytjan Saǵyntaev jolairyqtar men kóshelerdi uzartý jumystaryn tekserdi, dep habarlaidy QazAqparat.
«Áýejai ainalymynda» tórt jáne alty jolaqty qozǵalysy bar úsh deńgeili jolairyǵynyń qurylysy júrip jatyr. Búginde Qulja traktisi boiyndaǵy uzyndyǵy 784 metr bolatyn eki estakadanyń biriniń qurylysy aiaqtalýǵa jaqyn. Qarasha aiynda onyń boiymen kólik qozǵalysyn ashý josparda.
Buqtyrma kóshesi boiynda 570 metrlik týnnel ótkeli salynyp jatyr. Jer deńgeiimen barlyq oń jaqty kireberister, sondai-aq «Alataý» shaǵyn aýdany baǵyty boiynsha jolǵa shyǵý qarastyrylǵan. Jolairyq kólik aǵyndarynyń qiylysýyn boldyrmaýǵa múmkindik beredi.
Qulja traktisiniń kólik ótkizý qabileti 15%-ǵa artady. Buqtyrma kóshesi boiynda – 30%. Túrksib aýdany men Almaty oblysynyń qala mańyndaǵy eldi mekenderiniń 350 myńǵa jýyq turǵynynyń mobildiligi artady.
Baqytjan Saǵyntaev sondai-aq Rysqulov dańǵyly men Emtsov kóshesiniń boiyndaǵy kópirden turatyn barlyq baǵyttaǵy jol airyǵynyń qurylys qarqynyn baǵalady. Estakadanyń uzyndyǵy – 186 metr. Jekelegen búiirli sezder boiynsha qozǵalys ashyq. Estakada qurylysyn keshiktirgen sońǵy 2 ýchaske alynyp tastaldy. Sonyń arqasynda qurylys qarqyny artty. Nysannyń daiyndyǵy – 80%.
Kólik airyǵy Rysqulov dańǵylynda kólik ótkizý qabiletin táýligine 80 myń avtomobilge deiin, Emtsov kóshesindegi ótkizý qabiletin 40 myńǵa deiin arttyrýǵa múmkindik beredi.
Budan ózge, Almaty ákimi Abai dańǵylyn úńgileýdiń barysymen tanysty. Momyshuly kóshesinen Naýryzbai aýdanynyń ákimshilik ortalyǵyna deiin uzyndyǵy 3,5 shaqyrym ýchaskede qurylys júrip jatyr. Ár baǵytta qozǵalys úshin 3 jolaq, Áshimov kóshesiniń ústinen 400 metrlik estakada, trotýarlar men velosiped joldaryn salý qarastyrylǵan.
Nysannyń daiyndyǵy shamamen 85 paiyz. Metropoliten jelisiniń ústindegi 600 metrlik ýchaske aiaqtalǵannan keiin jyl sońyna qarai jańarǵan dańǵyl boiynsha kólik qozǵalysyn ashý kózdelgen.
Naýryzbai aýdany «Taýsamaly» shaǵyn aýdanyndaǵy Qonaev kóshesin rekonstrýktsiialaý aiaqtalýda. Uzyndyǵy 1,2 shaqyrymdyq joldy 2-den 4 jolaqqa deiin keńeitedi, munda trotýarlar, velojoldar men aryq jelisi bolady. Nysan – 90 paiyz daiyn. Asfalttyń joǵarǵy qabatyn tóseý jumystary júrýde.
Almaty ákimi jumysty osy aidyń sońyna deiin aiaqtaýdy tapsyrdy.
Qarasha aiynda abattandyrý úshin aǵash kóshetteri otyrǵyzylady.
