@tengrinews.kz
Almatyda joǵary oqý oryndarynyń jataqhanalary tekserildi. Olardyń 20-sy stýdentterdi qabyldaýǵa daiyn emes ekeni belgili boldy, - dep habarlaidy Tengrinews.kz tilshisi "KTK" telearnasyna silteme jasap.
Jataqhanalardy depýtattar, qoǵam belsendileri jáne Tótenshe jaǵdailar departamenti ókilderinen quralǵan birlesken komissiia teksergen. Tekserý barysynda kóptegen kemshilik anyqtalǵan. Mysaly, Qyzdar pedagogikalyq ýniversiteti jataqhanasyndaǵy as úide sý joq. Ákimshilik kúrdeli jóndeýge qarjy jetpeidi dep otyr. Sondyqtan qolda bardan jaǵdai jasaýǵa tyrysady.
"Uiymnyń quqyqtyq mártebesiniń ózi qarjy tartý úshin belgili bir máselelermen ainalysý kerek ekenin meńzep otyr. Memleket bas tartpaidy, biraq qyrýar qarjy talap etetin máseleler bar. Jataqhana salý nemese kúrdeli jóndeý, rekonstrýktsiia jáne t.b." - dedi Qazaq ulttyq qyzdar pedagogikalyq ýniversitetiniń Strategiialyq damý jáne áleýmettik jumys jónindegi prorektory Janar Ryspekova.
Qazaq sport jáne týrizm akademiiasy jataqhanasynda qurylysshylar jóndeý jumystaryn asyǵys aiaqtap jatyr. Áýelgide ákimshilik stýdentterge arnalǵan taza, jaily bólmelerdi kórsetken. Biraq keiin basqa bólmelerdi de kórsetýge májbúr bolǵan. Olardyń edenderi las, esikteri syzylǵan jáne tósek jabdyqtary eski bolyp shyqty. Jataqhanada taraqandar da tabylǵan.
Bul ǵimaratta jýyný úshin stýdentterge jertólege túsýi kerek bolady. Sondai-aq, kir jýatyn bólme de sol jerde. Tekserýshiler jyl ótken saiyn birdei zańbuzýshylyqtar anyqtalatynyn aitady. Almatydaǵy 95 jataqhananyń 20-sy stýdent qabyldaýǵa daiyn emes, beseýiniń jaǵdaiy múshkil.
"Monitoring aiaqtalǵannan keiin usynymdar ázirlenedi. Árine, biz bul máseleni Almaty qalasy máslihatynda qarastyramyz. Árine, Amanat partiiasy janyndaǵy bilim berý keńesterinde ári qarai usynystar berý arqyly qarastyramyz. Joǵary oqý oryndarynyń basshylyǵy atsalysady, óitkeni problemalar kóp jáne sheshýdi qajet etedi", - dedi Almaty qalasy máslihatynyń depýtaty Ásiia Aqanova.
Qazir sheneýnikter stýdentterdi qalai ornalastyrýdy oilastyryp jatyr.
