Almaty ákimi Baqytjan Saǵyntaev kúrdeli jóndeýden ótken Jazýshylar úiine bardy, dep habarlaidy "Ult aqparat".
Jazýshylar úii 1955 jyly salynǵan jáne munda kópten beri jóndeý jumystary júrgizilmegen. Ótken jyly alǵashqy kezdesýlerdiń birinde jazýshylar qaýymdastyǵy Almaty ákimi B. Saǵyntaevqa úidi jóndeýge kómektesý týraly ótinish bildirgen edi. Ǵimaratty jóndeý jumystarynyń nátijeleri týraly megapolis ákimi óziniń Instagram-daǵy paraqshasynda jazdy.
«Bul týraly jazýshylar qaýymdastyǵymen ótken jyly bolǵan kezdesýde aityldy. Sol jyly Jazýshylar úiin retke keltirý týraly sheshim qabyldandy. Nátijesinde shatyr, elektrmen jabdyqtaý jáne jylytý júieleri aýystyrylyp, ishki árleý jańartyldy», — dep jazdy B. Saǵyntaev.
Megapolis ákimi klassitsizm stilinde boi kótergen ǵimarat pen onyń intereriniń sáýlettik kelbetin saqtap qalý qajettigine basa nazar aýdardy.
«Bul ádebiet ǵibadathanasynda bir kezderi eńbek etken Muhtar Áýezov, Sábit Muqanov, Ábdijámil Nurpeiisov, Oljas Súleimenov syndy ulylardyń atmosferasyn saqtap qalý úshin qajet edi», — dep atap ótti qala ákimi.
«Aqyn-jazýshylardy qoldaý úshin Jazýshylar Odaǵynyń usynýymen avtorlardyń 30 kitabyn shyǵarýǵa qarajat bólindi. Kitap qaladaǵy jáne mektep kitaphanalarynyń qoryn tolyqtyrady. Mundai qoldaý kelesi jyly da jalǵasyn tabady», — dep habarlady B. Saǵyntaev.
