Almatyda dástúrli emes dini aǵym ókilderi jinalatyn oryndarǵa baqylaý júrgizilip jatyr, bul týraly kaz.tengrinews.kz tilshisine Almatynyń din isteri basqarmasynyń jetekshisi Aidar Esenbekov málimdedi.
Onyń aitýynsha, Almatyda radikal bolýy múmkin tulǵalardy anyqtaý boiynsha jumys júrgize otyryp, quzyrly organdar adamdy radikaldarǵa syrt kelbetimen uqsas keletin adamdardy ustaýy múmkin. "Qala úlken. Osy ideialardy ustanatyndar bar. Olar bizdiń aramyzda ómir súrip júr, oqidy, jumys isteidi, meshitke barady, zańǵa qaishy kelmeýi múmkin. Tek zań buzylsa ǵana jaýapqa tartylady. Biraq, tek syrt kelbetine qarap ustaýǵa bolmaidy. Adam qatelesedi. Bireýler burys baǵyt bergen bolýy múmkin. Olarmen áńgimelesse, durys jolǵa oralyp ta jatady", - deidi Esenbekov.
Onyń sózinshe, qalada radikaldy ideialar nasihattalyp, adamdardy óz jaǵyna tartýy múmkin oryndarǵa baqylaý júrgiziledi.
"Olar jinalatyn birneshe meshit bar. (...) Saýdagerleri dástúrli emes aǵymda júrgenin baiqatatyn birneshe saýda úii men bazarlar bar. CarCity avtobólsheketer bazary bar, aerovokzal bar, telefon satady ol jerde, nazarymyzǵa túsken taǵy bir oryn Kók bazardaǵy saýda núktesi. Baraholkadaǵy kei bazarlar, dini oqýlyqtar satylatyn oryndar", - deidi vedomstvo basshysy.
Sonymen qatar Aidar Esenbekov dinge bet burǵysy kelgen, biraq, radikaldy aǵymdar jeteginde ketip qalǵysy kelmeitin turǵyndarǵa óz usynystaryn aitty.
"Men birden aitaiyn Namazǵa jyǵylǵysy nemese Islamǵa bet burǵysy kelgen adam meshitte qyzmet atqaratyn resmi imamǵa barýy kerek. Kóshede bireýlermen bul másele boiynsha tildesýdiń keregi joq. Eger báz bireýler dáris tyńdaýǵa shaqyrsa, film kórgýe shaqyrsa, birden qaýiptený qajet. Onymen barmasyn, meshitke barsyn", - dep óz keńesin berdi Esenbekov.
Sonymen birge, ol din isteri komiteti qandai kitaptar oqýǵa bolatynyn jáne meshit mekenjailary kórsetilgen 20 saittyń tizimin jariialaǵanyn atap ótti.
