Elbasynyń bastamasymen jariialanǵan «Jastar jyly» almatylyq jastar úshin tabysty boldy.
2019 jyly qalada 100-den astam sporttyq, mádeni jáne tanymdyq shara ótti. Oǵan 120 myńnan astam jas qatysty. 15 myńǵa jýyq azamat jumyspen qamtyldy. Bul týraly Almaty ákiminiń orynbasary Erjan Babaqumarov «Jastar jylyn» qorytyndylaýǵa arnalǵan forýmda aitty, dep habarlaidy QazAqparat tilshisi.
Jastar forýmyna qatysqan qala ákiminiń orynbasary Erjan Babaqumarov eldiń eń belsendi jáne qoǵamnyń qozǵaýshy kúshi jastar ekendigin atap ótti.
«Almaty - jastar qalasy. Búginde megapoliste 700 myńǵa jýyq jas bar. Iaǵni árbir úshinshi turǵyn - jas. Onyń 233 myńy - stýdent. Olar 39 ýniversitet pen 80 kolledjde bilim alyp jatyr. Sapaly bilim – bolashaqtyń kepili. Dostar, elimizdiń bolashaǵy sizdiń bilimińizge, kúsh-jigerińizge jáne patriotizmge tikelei bailanysty», - dedi quttyqtaý sózinde qala ákiminiń orynbasary Erjan Babaqumarov.
Qala ákimdigi jastarǵa erekshe kóńil bóledi. Qoljetimdi jáne sapaly bilim, jumys, turǵyn úi jáne jas otbasylardy qoldaý siiaqty praktikalyq máseleler sheshilýde. Qazaqstannyń Tuńǵysh Prezidenti - Elbasy Nursultan Nazarbaevtyń tapsyrmalaryn oryndaý aiasynda jumys isteitin jastarǵa 249 páterdiń kilti tabystaldy.
2019 jyly Almatyda 100-den astam sporttyq, mádeni jáne tanymdyq shara ótti. Oǵan 120 myńnan astam jastar qatysty. Al, qaladaǵy eń iri shara Shymbulaqta birinshi Ortalyq Aziia jastar festivaliniń ótýi boldy. Oǵan 6 memlekettiń jastary qatysqan edi. Sonymen qatar «QS World Wide – 2019» kórmesi men halyqaralyq konferentsiiany atap ótýge bolady. Osynyń bári Almatynyń belsendi ári talantty jastarynyń arqasynda júzege asty.
Forým aiasynda belsendi qala jastary marapattaldy. Olardyń arasynda jas kásipkerler, ǵalymdar, rejisserler, akterler, sýretshiler, ýniversitet oqytýshylary, jastar qozǵalysynyń jetekshileri bar.
