Foto: Polisia.kz
Almatyda zańsyz ainalymnan jarty tonnadan astam esirtki tárkilenip, úsh qylmystyq toptyń qyzmeti toqtatyldy, – dep habarlaidy Ult.kz Polisia.kz-ke silteme jasap.
Esirtki qylmystaryna qarsy kúres – politsiia jumysynyń basty baǵyttarynyń biri. Bul jumys Memleket basshysy jariialaǵan "Zań men tártip" qaǵidaty jáne profilaktika jyly aiasynda júrgizilýde.
"Bizdiń negizgi maqsatymyz – azamattardyń, ásirese jas urpaqtyń densaýlyǵy men qaýipsizdigin saqtaý, qoǵamdy esirtki qaýipinen qorǵaý. Biylǵy jyldyń toǵyz aiynda Almaty qalasy politsiiasynyń bólimsheleri 500-den astam esirtki qylmysyn anyqtady. Zańsyz ainalymnan 525 keliden astam esirtki zaty, onyń ishinde 52 keli sintetikalyq jáne 3 tonnadan astam prekýrsor tárkilendi. Sondai-aq qylmystyq jolmen alynǵan 255 million teńgeden astam aqsha men múlik memleket kirisine ótkizildi", – dedi Almaty qalasy politsiia departamenti bastyǵynyń birinshi orynbasary Qýatbek Naýatov.
Sonymen qatar eki esirtki zerthanasynyń qyzmeti toqtatylyp, esirtkini ótkizý jáne taratýǵa qatysy bar 3 qylmystyq toptyń áreketi áshkerelendi.
Politsiia qyzmetkerleri qazirgi zamanǵy tsifrlyq tehnologiialardy belsendi qoldanýda. Ulttyq bank jáne Mádeniet jáne aqparat ministrligimen birlesken jumys nátijesinde biyl zańsyz esirtki ainalymyna qatysy bar 1,5 myń otandyq jáne 5 myńnan astam sheteldik bank kartasy, sondai-aq 312 kriptoámiian anyqtalyp, buǵattaldy. 68 million teńge somasyndaǵy kúdikti bank operatsiialarynyń qyzmeti toqtatyldy. Sondai-aq esirtki taratýǵa paidalanylǵan 2200 internet-resýrs buǵattaldy, olardyń 27-si – telegram-arna.
Bilim berý uiymdary, jastar birlestikteri jáne jergilikti atqarýshy organdarmen birlesip, 700-den astam kezdesý, naýqan jáne túsindirý is-sharalary ótkizildi.
Qala kóshelerinde esirtki jarnamasy bar graffitiler kún saiyn boialyp, áleýmettik beinerolikter kórsetilýde, jedel jeli men anonimdi chattar turaqty túrde jumys isteidi.
"Alaida erekshe atap ótkim keledi: esirtkige qarsy kúres – tek politsiianyń qolynda emes. Bul – búkil qoǵamnyń ortaq jaýapkershiligi. Ata-analardan bastap, pedagogtar, BAQ ókilderi men biznes qaýymdastyǵyna deiin. Tek birlesip, belsendi azamattyq ustanymmen biz esirtki qaýipine qarsy tiimdi tosqaýyl qoia alamyz. Politsiia osy baǵyttaǵy júieli jumysyn jalǵastyra beredi, basty basymdyq – jazalaý emes, aldyn alý men túsindirý jumystary", – dedi, Qýatbek Naýatov.
