Foto: Tengrinews.kz/Álihan Sariev
Almatyda jappai tártipsizdik kezinde keltirilgen shyǵynnyń jalpy somasy 95 mlrd teńgeden asady. 1600 kásipkerlik sýbekti zardap shekti. Onyń 96 paiyzy shaǵyn jáne orta biznes ókilderi. Bul týraly brifing barysynda qala ákiminiń orynbasary Iliias Óserov málim etti, dep habarlaidy QazAqparat.
Onyń aitýynsha, zardap shekken shaǵyn jáne orta bizneske ótemaqy tóleý mehanizmi ázirlengen. Bul baǵytta memlekettik organdardyń qatysýymen arnaiy komissiia jumys isteidi. Onyń quramyna depýtattar men qoǵamdyq birlestikter, «Atameken» UKP-nyń qyzmetkerleri kirdi.
«Biznes sýbektileriniń ótinishi elektrondy túrde Infokazakhstan.kz saitynda qabyldanady. Onda jeke kásipker men zańdy tulǵalar ózderiniń kásipker ekenin rastaityn jáne keltirilgen shyǵynnyń foto, videosyn kórsetedi. Sodan soń ony óńirlik jáne qor komissiiasy 5 kún ishinde qaraidy. Qazir Almatyda ákiminiń tapsyrmasymen qurylǵan Óńirlik komissiia jappai tártipsizdikten qalaǵa keltirilgen shyǵyndy áli eseptep jatyr. Búgingi kúni aldyn ala boljam boiynsha jalpy shyǵyn 95 mlrd teńgeden asty. Onyń ishinde 54 ákimshilik nysan zaqymdanǵan. Quqyqqorǵaý jáne kommýnaldyq qyzmettiń 260 kóligi, odan bólek jeke tulǵalardyń 150 avtokóligi órtengen, iaǵni 2 mlrd teńgeden astam shyǵyn keldi»,- deidi Iliias Óserov.
Spikerdiń sózinshe, qalada 1600-ge jýyq biznes sýbektisi zardap shekti. Oǵan keltirilgen shyǵyn 66,5 mlrd teńge kóleminde. Onyń 96 paiyzy shaǵyn jáne orta biznes ókilderine tiesili.
Budan bólek, Almaty qalasynyń ákimdigi qarjylyq jáne qarjylyq emes qoldaý sharalaryn ázirlep jatyr.
