Almaty politsiiasy adamdar kóshede esinen tanyp, qulap jatqany týraly videolarǵa túsinik berdi, dep habarlaidy "Ult aqparat".
Politsiia departamentiniń málimetinshe, olardyń eshqaisysy shyndyqqa janaspaidy.
«Shyndyǵynda, mynadai faktiler boldy. Birinshi oqiǵa - Gogol men Muratbaev kósheleriniń qiylysynda jaiaý júrginshini kólik qaqty. Trolleibýs qaqqan áiel aýyr jaraqat aldy. Is boiynsha tergeý bastaldy, saraptama taǵaiyndaldy. Ekinshi epizodta - «102» nómirine mas adam joldyń boiynda jatqandyǵy týraly qońyraý kelip tústi. Ýchaskelik inspektor aqparatty rastady. Er adamǵa alǵashqy meditsinalyq kómek kórsetildi. Úshinshi jaǵdaida avtobýstardyń birinde jolaýshynyń jaǵdaiy kúrt nasharlaǵan (epilepsiialyq talý). Qasyndaǵylar ony kóshege shyǵaryp, «jedel járdem» shaqyrdy. Sondyqtan, qalada adamdar jappai esinen tanyp jatqany týraly aqparattar – jalǵan», - dedi vedomstvodan.
Sonymen birge, politsiia bile tura jalǵan aqparat taratqany úshin qylmystyq jaýapkershilik týraly eske salyp, tótenshe jaǵdai kezinde bul áreketter úsh jyldan jeti jylǵa deiingi merzimge bas bostandyǵynan aiyrýǵa nemese shekteýge ákep soqtyratynyn aitty.
«Biz azamattardy jalǵan, rastalmaǵan aqparatty shyndyq retinde berip, qoǵamda negizsiz dúrbeleń týdyrýdan aýlaq bolýǵa shaqyramyz. Bul - qylmys jáne sol úshin jazaǵa tartylady. Ádette, derek kózi belgisiz aqparatqa úlken kúmánmen qaraý kerek», - dedi Politsiia departamentinen.
