Foto: Almaty ákimdigi
Jańa jyl jaqyndaǵan saiyn Almatydaǵy Panfilov kóshesi qylqan japyraqtyń iisi men merekelik kóńil-kúige toly naǵyz qysqy bazarǵa ainaldy. Jármeńke árkim úiine jańa jyldyq shyrsha tańdai alatyn almatylyqtardyń súiikti ornyna ainaldy, dep habarlaidy ákimdiktiń bapsasóz qyzmeti.
Jármeńkede satyp alýshylarǵa biik shyrshadan bastap shaǵyn ydystaǵy aǵashtarǵa deiin túrli taýar usynylǵan.
– Men jyl saiyn bazardan shyrsha satyp alamyn, biraq biyl dál osy jerden satyp alýdy sheshtim, óitkeni baǵasy birdei. Balalarmen kelip shyrsha tańdap jatyrmyz, pirándikterden dám tatyp, jarqyraǵan qondyrǵylardyń janynda sýretke tústik. Mundaǵy atmosfera keremet, sharshaǵanyńdy umytasyń, sýyq ta sezilmeidi. Jańa jyldyń jaqyndap qalǵany anyq seziledi, – dedi Erlan Qasymov.
Jármeńkede klassikalyq qylqan japyraq aǵashtarymen qatar qarmen kómkerilgendei sándelgen dizainerlik shyrshalardy da satyp alýǵa bolady. Mundaǵy assortimenttiń moldyǵyn qala turǵyndary erekshe atap ótýde.
– Biz qurbymyzben jai ǵana kórip qaitýǵa kelgen edik, biraq qyzyǵyp, shyrsha, oiynshyqtar men girliandalar satyp aldyq. Endi birge jinalyp, shyrshany bezendirip, kakao ishemiz. Munda sondai ádemi, jyly ári jaily, ketkiń kelmeidi. Bul jármeńke qalanyń eń keremet oryndarynyń birine ainalǵanyna senimdimin, – dedi stýdent Alina Ábildaeva.
Jármeńkeniń bezendirilýi erekshe áser qaldyrady: girliandalar, jarqyraǵan shamdar, fotoaimaqtar – munyń bári ǵajaiyp merekelik kóńil-kúi syilaidy. Ásirese, qar basqan shanalar, jarqyraǵan aqqalalar men buǵynyń músinderi balalardy qýantady.
