Almatyda 700 orynǵa arnalǵan jańa infektsiialyq gospital salynýy múmkin. Bul týraly qalalyq Qoǵamdyq keńestiń video otyrysynda qalalyq Qoǵamdyq densaýlyq saqtaý basqarmasynyń basshysy Tileýhan Ábildaev aitty, dep habarlaidy "Ult aqparat".
«Bizde 2 infektsiialyq statsionar jumys istep tur. Alaida ekeýinde de infektsiialyq baqylaý talaptaryna sáikes jeldetý júiesi tolyq jumys istemeidi. Osyǵan bailanysty qazir qala ákimdigi men qala ákiminiń jeke óziniń tarapynan barlyq talaptarǵa sai keletin 700 oryndyq jańa gospital salý týraly shara qabyldanyp jatyr. Bul saýal Memleket basshysynyń Almatyǵa sapary barysynda kóterildi. Atalǵan saýal kezeń-kezeńimen sheshimin tabatyn bolady», - dedi qalalyq Qoǵamdyq densaýlyq basqarmasynyń basshysy Tileýhan Ábildaev.
Basqarma basshysy keńes kezinde salynǵan aýrýhanalardyń barlyǵy derlik talapqa sai emestigin jetkizdi.
Aita ketý kerek, 24 sáýirde Almatyda koronavirýspen aýyrǵan naýqastardy emdeýge arnalǵan jańa gospital ashylǵan bolatyn.
Aýmaǵy 5 850 sharshy metr bolatyn jańa gospital bir mezette 280 naýqas qabyldai alady. Qarqyndy terapiia bólimine 28 oryn bólingen. Munda 28 ókpeni jeldetý apparaty bar.
