Almatyda balet teatry men zamanaýi kongress-ortalyq salynady, dep habarlaidy "Ult aqparat" ákimdiktiń baspasóz qyzmetine silteme jasap.
«Almaty qalasyn damytý 50 draiver-jobasy» aiasynda 2020 jyly turǵyzylatyn Balet teatry Ál-Farabi dańǵylynyń boiymen jáne Nazarbaev kóshesiniń batys jaǵynda uzaq ýaqyt boiy bos turǵan jer ýchaskesinde salynbaq.
«Ǵimarattyń arhitektýrasy - erekshe bolmaq. Onyń ishine sýburqaqtar salynyp, tolyqtai kógaldandyrlady. Qurylys kópqabatty elementtermen tolyqtyrylady. Túsi men paidalanylatyn jaryqtyń da mańyzy zor», - dep túsindirdi ákimdik.
Joba boiynsha teatrdyń keńistigi jartylai fýnktsionaldy jáne transformaly bolmaq. Ol jerde túrli iskerlik kezdesýler men saltanatty sharalar ótkiziletin bolady. Ǵimarat ishinde balalarǵa arnalǵan horeografiia mektebin ashý da josparda bar.
Almaty qalasynda jyl saiyn 50-den astam túrli halyqaralyq is-shara ótedi. Sondyqtan zamanaýi kongress-ortalyǵynyń qurylysy qajettilikterden týyndaýda.
«Almaty qalasynyń 50-den astam jobasy» aiasynda biylǵy jyly birqatar áleýmettik infraqurylym nysandarynyń qurylysy aiaqtalady, sondai-aq seismikalyq kúsheitý jáne ǵimarattardy qaita jańartý, kósheler men saiabaqtardy abattandyrý jumystary júrgiziledi. Tek osy jobalardyń arqasynda 5 myńǵa jýyq qosymsha jumys orny ashylyp, qalalyq biýdjetke 8,8 mlrd teńge salyq túsimi tústi.
Jyl sońyna deiin Respýblika alańy, Dostyq dańǵyly, Baiseiitova jáne Jibek joly kósheleri, Vernenskii observatoriiasy, Almaty zoobaǵy, Medeý densaýlyq baspaldaǵy men Myńjyldyq sýburqaǵyn qaita qalpyna keltirý jumystary aiaqtalady. Sondai-aq, qalanyń segiz aýdanyndaǵy barlyq jaiaý júrginshiler jolyndaǵy jumystar bitedi dep kútilýde.
Budan basqa, otbasylyq dárigerlik ambýlatoriia qurylysy, №4 perzenthana men Túrksib aýdanyndaǵy psihonevrologiialyq mektep-internatynyń janynda boi kótergen qosalqy ǵimaratar qoldanysqa berilmek.
Sonymen qatar Alataý aýdanyndaǵy jedel-meditsinalyq qosalqy stantsiia men patologoanatomiialyq biýronyń da qurylysy aiaqtalmaq jáne taǵy 6 jańa balabaqsha men 10 mektep paidalanýǵa beriledi.
