Almaty ákimi Baqytjan Saǵyntaevtyń tóraǵalyǵymen ótken apparattyq keńeste jaily qalalyq orta basqarmasynyń basshysy Sapar Nurashev qalanyń zardap shekken nysandaryndaǵy qalpyna keltirý jumysy týraly esep berdi, dep habarlaidy QazAqparat.
Sapar Nurashevtiń aitýynsha, jekemenshiktegi nysandar shaǵyn jáne orta sanatyna aýystyryldy.
Olar - «Mir 24» telearnasy, «Almaty halyqaralyq áýejaiy» ǵimaraty, Nur Otan partiiasynyń ǵimaraty (Tóle bi kóshesi, 277).
Sonymen qatar, kelissóz barysynda Tuńǵysh Prezident qorynyń ǵimaratyn qordyń óz qarajaty esebinen qalpyna keltirý týraly sheshim qabyldandy.
«27 nysan qaita qalpyna keltirýge jatady, onyń ishinde 10 obekti boiynsha qalpyna keltirý biýdjet qarajaty esebinen júrgiziledi. Olar: ákimdik ǵimaraty, «Qazaqstan» telearnasy, Prezident rezidentsiiasy, prokýratýra ókildiginiń jáne quqyqtyq statistika jáne arnaiy esepke alý jónindegi komitet basqarmasynyń ǵimaraty. Sondai-aq 6 nysanǵa aǵymdaǵy jóndeý jumysy júrgizildi: politsiia departamentiniń ǵimaraty jáne front-ofis, Almaly aýdandyq politsiia basqarmasynyń ǵimaraty jáne front-ofis, Almaly aýdandyq politsiia bóliminiń ǵimaraty jáne front-ofis», – dep atap ótti qalalyq jaily orta basqarmasynyń basshysy.
Ol «QazQSǴZI» AQ, «Qazmirr» AQ (qazaqstandyq kópsalaly qaita qurý jáne damý institýty – Prezident Rezidentsiiasynyń ǵimaraty) institýtymen jáne basqa da akkredittelgen uiymdarmen tehnikalyq tekserý, JSQ ázirleý jáne aǵymdaǵy jóndeý boiynsha smetalyq esepter boiynsha jumystar júrgizilip jatqanyn habarlady.
Qalǵan 17 nysan az ǵana shyǵynǵa ushyrady, sonyń negizinde qalpyna keltirý biznestiń áleýmettik jaýapkershiligi aiasynda júrgiziledi.
Bul 5 nysan: №7 qalalyq klinikalyq aýrýhana, qalalyq kardiologiialyq ortalyq, №1 perzenthana, Almaly aýdanynyń MSAK №12 ortalyq klinikalyq aýrýhanasy; politsiia departamentiniń 10 modýldik beketi; Áýezov jáne Jetisý aýdandarynyń front-keńseleri bar 2 politsiia basqarmasynyń ǵimaraty.
Sapar Nurashevtiń aitýynsha, Qurylys komiteti basshysynyń tóraǵalyǵymen birneshe keńes ótkizilip, onda tiisti sheshim qabyldanǵan.
«21 qańtarǵa deiin barlyq nysan boiynsha smetalyq esep daiyndalady. 25 qańtarǵa deiin tehnikalyq tekserý aiaqtalady. Al, 15 naýryzǵa deiin kúrdeli jóndeý men qaita jańartý júrgiziletin obektiler boiynsha JSQ ázirlenedi»,- dedi ol.
