Almatyda zańsyz ainalymnan 8,5 millionǵa jýyq birrettik meditsinalyq maska tárkilendi, dep habarlaidy "Ult aqparat".
QR Sybailas jemqorlyqqa qarsy is-qimyl agenttigi Almaty qalasy boiynsha departamentiniń qyzmetkerleri dári-dármekter men maskany zańsyz jetkizýshilerdi anyqtaý boiynsha jumystar júrgizdi.
«Qolǵa alynǵan shara aiasynda Almatyda birqatar reidter ótkizdik. Dári-dármek tapshylyǵynyń sebebin anyqtaý úshin bizdiń qyzmetkerler «SQ-Farmatsiia» qoimasyn tolyq tekserip shyqty»,– deidi QR Sybailas jemqorlyqqa qarsy is-qimyl agenttigi Almaty qalasy boiynsha departamentiniń basshysy Nyǵmetjan Saparov.
Sonymen qatar, ol Sybailas jemqorlyqqa qarsy is-qimyl agenttiginiń qyzmetkerleri Almatyǵa kelgen gýmanitarlyq kómekterdiń durys taratylýyn qadaǵalaǵanyn atap ótti.
Budan bólek, zańsyz ainalymnan 8,5 millionǵa jýyq birrettik maska tárkilengen.
«Osy maskalar boiynsha qazirgi ýaqytta tergeý jumystary bastaldy. Tárkilengen meditsinalyq maskalar arnaiy saraptamadan ótkennen keiin, Almaty qalasynyń ákimdigine tapsyramyz. Olar zańsyz ainalymǵa qaita túspeýi úshin meditsinalyq mekemelerge aqysyz jiberiledi dep úmittenemin», - dep atap ótti departament basshysy.
