Foto: Almaty ákimdiginiń baspasóz qyzmeti
Almatyda zańsyz saýda dúńgirshekteri buzylyp jatyr, dep habarlaidy 24KZ.
Atameken óńirlik kásipkerler palatasynyń málimetinshe, endi qalada ruqsat etilmegen jerge dúńgirshek nemese jyljymaly sóre ornatyp saýda jasaýǵa bolmaidy.
Alaida bul sheshim shaǵyn kásipkerlikti damytýǵa kedergi keltirmei me? Almatyda 300-den astam ýaqytsha ornalastyrylǵan nemese jyljymaly saýda jáne qyzmet kórsetý nysandary buzyldy. «Al sonda olar osy kúnge deiin qalaisha turaqty jumys istedi? Kásibi qalaisha zańsyz dep tanyldy?» degen suraq týyndaidy.
Qalalyq kásipkerlik jáne investitsiialar basqarmasynyń ókili Ábilqaiyr Baýyrjanuly zańsyz nysandardy buzý jumystary buryn da júrgizilgenin aitady. Alaida buǵan deiin qalada dúńgirshekter men kioskilerdi qoiýǵa bolatyn jerler belgilenbei kelgen. Tek qala ákimdiginiń qaýlysy qabyldanǵannan keiin ǵana osyndai saýda nysandaryn ornatýǵa ruqsat núkteler kórsetildi. Osydan keiin nysan ielerin ákimshilik jaýapqa tartý boiynsha sharalar qolǵa alyndy.
Ábilqaiyr Baýyrjanuly, qalalyq kásipkerlik jáne investitsiialar basqarmasynyń strategiialyq damý bóliminiń basshysy:
- Kóshedegi zańsyz sýdany joiý jumys tobymen birlesip, zańsyz ornatylǵan saýda obetilerin buzý jumystaryn júrgizip jatyr. Sonymen qatar Jer resýrstaryn basqarý departamenti aýdan ákimdikterimen birlesip, zańsyz ornatylǵan 230 saýda oryndary ielerine habarlama tabystady.
Almatyda kúshólshegishter kóp. Olar da saýda nysany sanalady. Eger ol zańsyz ornatylsa, iesi Ákimshilik kodekstiń 204-baby boiynsha jaýapqa tartylady. «Jańa qaýlynyń kemshiligi de joq emes. Óitkeni qujatta kásipkerler múddesi tolyq eskerilmegen», – deidi qalalyq kásipkerlik palatanyń zańgeri.
Erkebulan Beiimbet, Almaty qalasy «Atameken» ÓKP bólim basshysy:
- Qazirgi ýaqytta sol qaýlynyń negizinde 142 oryn bekitilgen. 142 orynda 157 kásipkerlik sýbektige ornalasýǵa ruqsat berilgen. Osy qaýly negizinde. Qalǵan barlyq statsionarlyq emes obektiler, baǵanaǵy dúńgirshekter zań sheńberinen shyǵyp ketip otyr. Iaǵni biz palata bul jaiynda aldynda aitqanbyz.
Osylaisha keibir shaǵyn kásipkerler jumysyn jalǵastyra almai otyr. Saýda jasap, qyzmet kórsetip tabys tabýyn eshkim shektemeidi. Biraq sol kásipti iske asyratyn zańdy oryn, iaǵni jer bolý kerek. Al ákimdik naqty kórsetken jer jetkiliksiz. Degenmen kásibin jalǵastyrý úshin eki amal bar.
Erkebulan Beiimbet, Almaty qalasy «Atameken» ÓKP bólim basshysy:
- Eki túsinik bar. Iaǵni jekemenshik jerlerdi alýǵa bolady. Bolmasa memlekettik jerlerde ornalasýǵa bolady. Memlekettik jerde ornalasqan baǵanaǵy dúńgirshekter zańdastyrýǵa jatpaidy. Satyp alý emes ol jerde. Memlekettik satyp alý arqyly 5 jylǵa jalǵa alýǵa bolady.
Qala ákimdigi statsionarlyq emes saýda nysandaryn buzý nemese kóshirý jumysyn osy aidyń sońyna deiin aiaqtaýdy josparlaidy. Qazirgi ýaqytta 71 nysanmen jumys júrgizilip jatyr.
