Almatyda zańsyz satylǵan uńǵyma memleketke qaitaryldy. Bul týraly Almaty qalalyq prokýratýranyń baspasóz qyzmeti málim etti, dep habarlaidy QazAqparat.
Vedomstvanyń málimetinshe, Almaty qalasy prokýratýrasynyń talap aryzy boiynsha Bostandyq aýdanyndaǵy «Ermensai» shaǵynaýdanynyń turǵyndaryn sýmen qamtamasyz etetin sý sorǵysh stantsiiasy bar aýdany 1 ga jer ýchaskesi memlekettik menshikke qaitaryldy.
«Taldaý 2007 jylǵa deiin áleýmettik mańyzy bar nysan memlekettik menshikte, «Eńbek» respýblikalyq memlekettik kásipornynyń sharýashylyq basqarý quqyǵynda bolǵany anyqtaldy.
Almaty oblysy, Qarasai aýdany ákimdiginiń jáne «Eńbek» RMK qyzmetkerleri ýákiletti organnyń ruqsatynsyz «O» JShS jerin 470 400 teńgege zańsyz satqan. Bul laýazymdy tulǵalar ártúrli qylmystar úshin sottalǵan bolatyn»,- dep habarlady prokýratýradan.
Uńǵymany satqannan keiin kompaniia aýdan turǵyndaryna sýdy sata bastaǵan.
«Alaida aýyz sýdyń sapasy, káriz jelisiniń tozýy jáne tarifterdiń turaqsyzdyǵy aýdan turǵyndarynyń narazylyǵyn týdyrdy, sondai-aq osy faktiler boiynsha ártúrli organdarǵa kóptegen ótinishter kelip tústi.Taldaý qorytyndysy boiynsha prokýratýra Almaty qalasynyń mamandandyrylǵan aýdanaralyq ekonomikalyq sotyna talap aryzben júgindi. Sot talap aryzdy tolyq kólemde qanaǵattandyrdy, atap aitqanda, uńǵymamen ýchaskeni satyp alý-satý sharty jáne jekemenshik quqyǵy aktisi jaramsyz dep tanyldy»,- dep atap ótti vedomstvadaǵylar.
Qazirgi ýaqytta obektini qalanyń kommýnaldyq menshigine qabyldaý rásimi júrip jatyr, onyń kadastrlyq quny 60 mln teńgeden asady.
