Qarjylyq monitoring agenttigi Almatyda World Business Consulting qarjy piramidasynyń qyzmetin toqtatty, dep habarlaidy "Ult aqparat".
Almaty qalasy boiynsha qarjylyq monitoring agenttiginiń aýmaqtyq departamenti qalalyq prokýratýranyń úilestirýimen «World Business Consulting» qarjy piramidasyn qurý jáne oǵan basshylyq etý deregi boiynsha birqatar tulǵalarǵa qatysty sotqa deiingi tergeýdi bastady.
Qarjy piramidasyn uiymdastyrýshylar halyqqa World trend Strategies, Confidence World Group, HUBB international, Riviera imperial, Asteco jáne basqa úlestes kompaniialardyń investitsiialyq jobalaryna aqshalai qarajat engizýdi usyndy.
Óz kezeginde, bul kompaniialar zańdy qyzmetten emes, jańa salymshylardyń qarajaty esebinen syiaqy alýǵa kepildik berip otyrǵan.
Qarjy naryǵyn retteý jáne damytý agenttiginiń qorytyndysyna sáikes «World Business Consulting» qyzmetinde qarjy piramidasynyń belgileri anyqtaldy.
Qazirgi ýaqytta tergeý júrip jatyr.
QMA azamattardy saq bolýǵa jáne óz jinaqtaryn kúmándi qarjy uiymdaryna salmaýǵa shaqyrady.
Eger siz nemese jaqyndaryńyz «World Business Consulting» qyzmetine kez bolsa, Almaty qalasy boiynsha ETD-ge 8-775-923-40-90, 8 708 192 2818 telefondary boiynsha habarlasa alasyz.
Basqa qala turǵyndary tiisti qalanyń/oblystyń aýmaqtyq departamentine júgine alady.
