Almaty qalasynda bir táýlikte 9202 adam koronavirýsqa qarsy vaktsina saldyrdy. Bul týraly qalalyq qoǵamdyq densaýlyq saqtaý basqarmasy málim etti, dep habarlaidy QazAqparat.
«9 qyrkúiek kúni 9202 almatylyq vaktsina saldyrdy. Koronavirýsqa qarsy ekpeniń I komponentin 3790, II komponentin 5412 adam aldy. Vaktsina saldyrǵandar sany boiynsha Almaty qalasy aldyńǵy orynda. Biylǵy jyldyń 1 aqpany men 9 qyrkúiegi aralyǵynda qalada 903 291 turǵyn vaktsinanyń birinshi komponentin, 794 703 adam ekinshi komponentin saldyrǵan. Olardyń ishinde 114 702 adamnyń jasy 60-tan asqan», - dep habarlady basqarmadan.
Qalada 160 pýnkt jumys istep tur. 1 028 adamnan turatyn 237 egý brigadasy bar.
«Qazir meditsina uiymdarynda, mektepterde, mádeniet, sport obektilerinde, bazarlar men qalanyń SOSO-da vaktsinatsiia pýnkti jumys isteidi» - dep naqtylady densaýlyq saqtaý basqarmasynyń baspasóz qyzmeti.
