Megapolistegi qańǵybas janýarlardyń sanyn izgilikti túrde retteýdiń 2021-2024 jyldarǵa arnalǵan baǵdarlamasynyń sheńberinde Almaty qalasynyń ákimdigi úi mysyqtary men itterin tegin chipteý baǵdarlamasyn qaita iske qosty, dep habarlaidy QazAqparat.
Almaty ákimdiginiń málimetinshe, 2022 jyly qalada 15 myń úi janýaryn qamtý josparda. Chipteý rásimin sharýashylyq júrgizý quqyǵyndaǵy «Qalalyq veterinariialyq qyzmeti» kommýnaldyq memlekettik kásipornynyń veterinariialyq dárigerleri júrgizedi.
Janýarlardyń ielerine qolaily jaǵdai jasaý maqsatynda veterinariialyq qyzmet jeke sektordyń ár aýlasyn aralap júrip qaraýdy jáne aýdan ákimdikterimen birlesip chipteý boiynsha kóshpeli brigadalardyń jumysyn uiymdastyrýdy josparlap otyr.
Almaty qalasynyń kez kelgen turǵyny veterinariialyq qyzmettiń Sall-ortalyǵyna, telefony +7 708 595 6401, tapsyrys bere otyryp, óziniń úi janýaryn chipteýdi júrgize alady. Itter men mysyqtardy chipteýdiń shekteýli jasy 2 ai.
Chipteý – bul biregei 15 tańbaly nómiri bar janýarlardyń (itterdiń, mysyqtardyń) mikrochipin implantatsiialaý bolyp tabylatyn elektrondyq birdeilendirý. Janýar jáne onyń iesi týraly barlyq aqparat (biregei kod) «Pet Control» qalalyq derekter qoryna engiziledi. Baǵdarlama qaladaǵy janýarlardyń esebin durys júrgizý jáne joǵalyp ketken úi janýarynyń ielerin jedel izdestirý úshin qajet.
Budan basqa, chipteý rásimi úisiz janýarlar sanynyń ósýine qarsy kúres júrgizýdiń eń tiimdi sharasy. Qańǵybas janýarlardyń sanyna áser etetin jaittardyń qataryna ieleriniń tarapynan bolatyn jaýapsyzdyq, olardy baqylaýsyz ósirý, azyq bazasyn izdestirý maqsatynda qańǵybas janýarlardy Almaty oblysynyń aýmaǵynan kóshirý jatady.
Eske salaiyq, QR 2021 jylǵy 30 jeltoqsandaǵy «Janýarlarǵa jaýapkershilikpen qaraý týraly» Zańyna sáikes, respýblikada úi janýarlaryn chipteý 2023 jyldyń 1 qyrkúieginen bastap mindetti.
