Almaty áýejaiyna qozǵaltqyshy isten shyqqan ushaq qondy, - dep habarlaidy Tengrinews.kz.
Oqiǵa týraly aqparat 3 tamyzda áleýmettik jelilerde tarady. Jariialanǵan málimetke sáikes, ushaq áýege kóterilgennen keiin birden oralǵan. Aqparatqa súiensek, bul - 2017 jyldyń qazanynda Almaty mańynda AN-28 apatqa ushyrap, 5 adam qaza tapqan áýe kompaniiasyna tiesili ushaq.
Keiin bul aqparatqa Indýstriia jáne infraqurylymdyq damý ministrligi pikir bildirdi. Departament málimetinshe, sanitarlyq reis aqaýǵa bailanysty qonýǵa májbúr bolǵan.
"East Wing áýe kompaniiasynyń ushaǵy Almatydan Semeige ushyp shyqqan. Saǵat 11.12-de ushyp shyqqan reis komandiri sol jaqtaǵy qozǵaltqysh isten shyqqanyn jáne qaitqanyn habarlady. Ushaq saǵat 11.17-de aman-esen qondy. Bortta ekipajdyń bes múshesi jáne eki dáriger boldy", - dedi Indýstriia jáne infraqurylymdyq damý ministrligi baspasóz qyzmetiniń hatshysy Dáýlet Sámbetbaev.
Eske salaiyq, 2017 jyldyń 3 qazanynda Almaty mańynda An-8 ushaǵy apatqa ushyraǵan edi. Almatydan ushqannan keiin 12 minýttan soń East Wing áýe kompaniiasynyń An-28 ushaǵy radardan joǵalyp ketken bolatyn.
Bortta bes adam bolǵan. Ushaq apatynan professor, dáriger, akýsher-ginekolog Talǵat Patsaev pen professor, dáriger-reanimatolog Jánibek Artyqbaev, komandir Gennadii Tsoi, ekinshi ushqysh Evgenii Kýtafin, bortinjener Beishenbek Aqmatbaev qaza tapqan edi.
