Almatyda urlanǵan telefondardyń IMEI kodyn buzǵan programmist ustaldy, dep habarlaidy "Ult aqparat".
Kriminaldyq politsiianyń málimetinshe, 27 jastaǵy M. esimdi azamat zańsyz is-áreketin qalanyń Túrksib aýdanynda ornalasqan óz úiinde jasaǵan.
«Kúdiktiniń turǵylyqty jerin ruqsat etilgen tintý kezinde 42 qoldanylǵan uialy telefon, noýtbýk, eki planshet jáne bir jeke kompiýter tabylyp tárkilendi. Olardyń kómegimen kúdikti abonenttik qurylǵynyń sáikestendirý kodtaryn (IMEI) ózgertgen. Sonymen qatar, kúdiktiniń óziniń qylmystyq maqsatyn júzege asyrý úshin arnaiy kompiýterlik baǵdarlamany qoldanǵan», – deidi Almaty qalalyq politsiia departamenti bastyǵynyń orynbasary Berik Ábilbekov.
Ustalǵan adamnyń is-áreketi QR QK 213-babyna sáikes kvalifikatsiialanǵan.
Tárkilengen tsifrlyq qurylǵylardyń ielerin anyqtaý úshin jedel is-sharalar qabyldanýda.
