Foto: QR MAM
Abai atyndaǵy Qazaq ulttyq opera jáne balet teatrynda túrki opera óneriniń XXVI festivali aiasynda Gala-kontsert ótti. Bul aýqymdy mádeni is-sharany Halyqaralyq TÚRKSOI uiymy uiymdastyrdy, dep habarlaidy Ult.kz.
Kontsertke Qazaqstan, Túrkiia, Ózbekstan, Qyrǵyzstan elderiniń áigili opera solisteri, sondai-aq Abai atyndaǵy Qazaq ulttyq opera jáne balet teatrynyń simfoniialyq orkestri men hory qatysty. Olar ulttyq jáne álemdik klassika týyndylarynan ariialar oryndap, kórinis qoidy.
Is-sharada Qazaqstannyń eńbek sińirgen qairatkeri Erbolat Ahmediiarov, Qýanysh Ismailov jáne Qyrǵyz ulttyq akademiialyq opera jáne balet teatrynyń bas dirijeri Zahar Býtenko dirijerlik etti. Baǵdarlama shymyldyǵy E. Brýsilovskiidiń «Qyz Jibek» operasynyń úzindisimen ashyldy.
Sonymen qatar teatr alańynda túrki elderiniń opera jáne balet teatrlary direktorlary keńesiniń IV otyrysy ótti. Bul mádeni joba túrki áleminiń ónerin dáripteýge jáne halyqtar arasyndaǵy rýhani bailanysty nyǵaitýǵa baǵyttalǵan. Keńes músheleri teatr murajaiyn aralap, Qazaqstandaǵy eń kóne mýzykalyq teatrdyń tarihy jáne dástúrlerimen tanysty. Direktorlar otyrysyn TÚRKSOI Bas hatshylyǵy janyndaǵy Qazaqstan Respýblikasynyń ókili Nyshankúl Qarataeva ashyp, TÚRKSOI Bas hatshysy Sultan Raevtiń quttyqtaý hatyn oqyp berdi. Jiynda teatr óneri salasyndaǵy yntymaqtastyqty nyǵaitý men ózara áriptestik ornatý joldary talqylandy.
