Almatyda memleket aktivterin qaitarý jumystary aiasynda qylmystyq toptyń bir milliard teńgeden asa múlki tárkilendi, - dep habarlaidy "Ult aqparat" qala prokýratýrasynyń baspasóz qyzmetine silteme jasap.
Vedomstvo málimetinshe, 2017 jyly sottyń úkimimen jalǵan kásipkerlik pen aqshalai qarjyny qolma-qol ainaldyrǵany úshin uiymdasqan qylmystyq top sottaldy.
"Atap aitqanda, qylmyskerler 86 jalǵan kásipkerlik ashyp, 87 milliard teńgeden asa qarajatty qolma-qol ainaldyryp, 27,7 milliard teńgege salyq tóleýden jaltarǵan. Olar qylmystyq jolmen alynǵan qarajattaryn múlikterdi satyp alý arqyly zańdastyrǵan", - dedi vedomstvo qyzmetkerleri.
Sot úkimi boiynsha, qaladaǵy bedeldi aýdanda ornalasqan 1,3 myń sharshy metrge jýyq kólemde turǵyn úi qurylysy bar jalpy kólemi 1,4 gektar bolatyn eki jer telimi qaitaryldy. Jerlerdiń bireýinde tikushaq qonatyn alań ornalasqan. Ol nysannyń naryqtaǵy quny - shamamen 1 milliard teńge.
Sonymen qatar, prokýrorlar anyqtaǵandai, qylmyskerler múlikterin tárkileýden jaltartý úshin "piǵyldy" jospardy júzege asyrǵan. Osylaisha, jer telimderi sottalǵandardyń bireýiniń ákesiniń ieligine shyǵarylǵan. Keiin sot úkimin oryndaýdan jaltarý úshin jyljymaityn múlik tórt márte úlestes tulǵalardyń arasynda jer teliminiń konfigýratsiiasyn ózgertý arqyly júzege asyrylǵan. Jalǵan mámilelerdi jasaý nátijesinde múlik qaǵaz júzinde sottalǵandardyń bireýiniń qyzyna qaitarylǵan.
Budan bólek, osyndai "piǵyldy" josparlardy júzege asyryp, múlikti saqtap qalý úshin jer telimderiniń kezekti ieleriniń biri qasaqana jalǵan nekege otyrǵan.
"Almaty qalasy Bostandyq aýdanynyń prokýratýrasy atalǵan mámilelerdi, jalǵan neke týraly mámileni zańsyz dep taný týraly sotqa júgindi. Júrgizilgen aýqymdy sot protsesteri, sondai-aq azamattyq istiń apelliatsiialyq satyda qaralý nátijesi negizinde, qadaǵalaý organynyń talap aryzy tolyǵymen qanaǵattandyryldy. Qabyldanǵan sharalar memleket paidasyna baǵaly múlikterdiń qaitarylýyna negiz bolady", - delingen habarlamada.
