Almatylyq taksist týristi áýejaidan qalaǵa deiin 33 myń teńgege aparǵan, dep habarlaidy QazAqparat tilshisi.
Bul týraly qaladaǵy hostelderdiń biriniń iesi Shákir Islambakiev áleýmettik jelide jazdy.
Shákirdiń aitýynsha, taksister 2000 teńge dep kelisedi de, kelgen soń ár shaqyrymy 2000 teńge dep shyǵady eken.
Sheteldikter problema týdyrmas úshin tóleitin kórinedi.
«Eger taksister birden qymbat baǵany aitsa túsiner edim. Bulai aldaý shekten shyqqandyq qoi. Qonaq ketip qalǵan. Biraq jaǵymsyz ásermen ketkeni ras», - dedi ol.
Onyń aitýynsha, bul birinshi jaǵdai emes.
«4 jyl boiy men osy týraly aityp kelemin. Birneshe ret tekserý uiymdastyryldy. Biraq baiaǵy jartas - sol jartas. Almatyda ýniversiada bolǵan kezde taksisterdi áýejaidan qýyp shyqty emes pe? Bárin jasaýǵa bolady tek oǵan ynta bolsa», - dedi Shákir.
Almaty áýejaiy atalǵan oqiǵaǵa qatysty túsinik berdi.
«Áýejaiǵa kelgen jeńil kólik júrgizýshilerine kirýge tyiym salýǵa quqyǵymyz joq. Sebebi bul qoǵamdyq territoriia. Júrgizýshilerdiń turaq tólemi bolsa boldy, olar kire beredi. Al kei taksister jolaýshylardyń mazasyn alsa, jolaýshylar aryzdanýǵa quqyly. Biraq kópshiligi aryz jazbaidy. Sosyn másele quqyqtyq deńgeide kóterilmeidi», - delingen Almaty áýejaiynyń resmi jaýabynda.
Olardyń aitýynsha, áýejaida arnaiy resmi taksi qyzmeti jumys jasaidy.
