Foto: Roman Kýlakov, kaz.tengritravel.kz
Almatyda taksi júrgizýshisi sheteldik týristi áýejaidan hostelge 200 myń teńgege jetkizgen, - dep habarlaidy Tengritravel.kz.
30 jastaǵy Roman Kýlakov Almatyǵa dosynyń toiyna nemistiń Frankfýrt qalasynan kelgen. Ol - negizi Novosibir týmasy, alaida byltyr qańtardan beri Germaniiada aspirantýrada oqyp, sonda turady eken.
30 sáýirde ol Qazaqstanǵa kelgende keleńsiz oqiǵa bolǵan. Onyń ushaǵy Almaty áýejaiyna 21:40-ta qonyp, bir saǵattai tólqujat tekserý alańynan ótip, birinshi qabatqa túsken.
"Men wi-fi-ǵa qosylyp, brondalǵan hosteldiń ataýyn bilgim keldi jáne taksi shaqyraiyn dedim. Uzaq izdedim, biraq taba almadym. Janymda adam kóp edi, solardyń biri taksi júrgizýshisimin dep tanystyrdy. Óz qyzmetin usyndy. Men qala ortalyǵyna deiin qansha bolatynyn naqtyladym. Er adam 1500 teńge bolatynyn aitty. Sosyn men bankomattan aqsha sheship alaiyn dedim, óitkeni mende tek 200 eýrolyq kýpiýralar boldy. Ol maǵan joldan aiyrbastaitynymyzdy nemese basqa terminal tabatynymyzdy aitty. Odan keiin biz onyń kóligine bardyq, qara Mercedes, ol meniń sómkemdi bagajǵa saldy", - deidi týrist.
Saiahatshynyń aitýynsha, jol ortasyna jetkende taksi júrgizýshisi bankomat janyna toqtaǵan. Sheteldik azamat qolma-qol aqsha sheshpek bolǵan, alaida onyń kartasy buǵattalǵan eken. Sosyn Roman óz aqshasyn teńgege aýystyrmaq bolady, alaida taksi júrgizýshisi mundai ýaqytta aqsha aiyrbastaý pýnkteri jabyq bolatynyn aitqan.
"Sosyn men hosteldiń ataýyn esime túsirip, biz ary qarai júrdik. Birshama ýaqyttan soń ol dittegen jerge kelgenimizdi aitty, alaida qandai da bir jazý bolmady. Men qansha tóleýim kerektigin suradym. Ol maǵan 315 eýro bolǵanyn aitty. Men munyń alaiaqtyq ekenin bildim, óitkeni takside mundai baǵa joq. Tipti Frankfýrttyń ózinde ary ketse 90-100 eýro tóleimiz.
Men janjaldasqym kelmedi, sóitip baǵany 200 eýroǵa deiin túsirýdi suradym, sebebi mende sondai kýpiýralar bar edi. Biraq ol óz degeninen qaitpady. Men bagajdaǵy qundy zattaryma alańdai bastadym. Sosyn onyń dostary qarańǵy jerde meni kútip turýy múmkin degen oi keldi. Keiin ol maǵan jabyq turǵan aqsha aiyrbastaý pýnktine barýdy usyndy. Sóitip men 400 eýromnan aiyryldym. Sońynda men oǵan "osymen ómir súrýińe týra keledi" dep aittym", - deidi sheteldik qonaq.
Roman Kýlakov quqyq qorǵaý organdaryna baryp, shaǵym túsirgen. Kóliktegi politsiia departamentiniń ókilderi bul isti tekserý jumystaryn dereý bastaǵandaryn málimdedi.
