Almaty qalasynyń Gogol kóshesinde ornalasqan kóppáterli turǵyn úi qorshaýǵa alyndy, dep habarlaidy Sputnik Qazaqstan.
Gogol kóshesindegi 75 úi, Qonaev kóshesindegi 51 úimen japsarlasa ornalasqandyqtan, qos turǵyn úi de túngi saǵat eki shamasynda quqyq qorǵaý organdarynyń qyzmetkerleri tarapynan qorshaýǵa alynǵan.
Italiialyq josparlaý boiynsha salynǵan turǵyn úidiń ár qabatyndaǵy balkondar bir jaǵynda ornalasqan ári kireberis esikteri de ortaq.
Almaty ákiminiń orynbasary Erjan Babaqumarov qalada koronavirýs juqtyrýdyń 11 oshaǵy anyqtalǵanyn málimdegen bolatyn. Ákimdik ókilderi olardyń ornalasqan jeri boiynsha tolyq aqparatty jaqyn arada habarlaimyz dep otyr.
Aita keteiik, Babaqumarov el aýzynda "altyn sharshy" atanǵan kóppáterli tuǵyn úilermen qatar "Suńqar" TK de karantinge jabylǵanyn rastady. Olar Dostyq 42 men 42a jáne Qabanbai batyr 68 meken jaiynda ornalasqan. Aýla tolyǵymen qorshalyp, tórt baqylaý-ótkizý pýnkti arqyly kirip-shyǵý qamtamasyz etilýde.
Eske sala keteiik, Memleket basshysy Qasym-Jomart Toqaevtyń sheshimimen 16 naýryzda elimizde tótenshe jaǵdai jariialandy.
19 naýryzdan bastap Nur-Sultan men Almaty qalalarynda koronavirýsqa bailanysty otyz kúndik karantin engizildi.
Qalalardyń ainalasynda kólik qozǵalysyn shekteitin baqylaý-ótkizý pýnktteri qoiyldy. Ol jerlerde politseiler, Ulttyq ulan qyzmetkerleri, áskeriler men dárigerler qyzmet etip jatyr.
Densaýlyq saqtaý ministrliginiń sońǵy deregi boiynsha, Qazaqstanda 49 adam koronavirýs juqtyrdy. Onyń 25-i – astanada, 22-si – Almatyda jáne eki adam Qaraǵandyda tirkeldi.
