Almatyda aqyn Shómishbai Sariev turǵan úige memorialdy taqta ornatyldy, dep habarlaidy QazAqparat.
Memorialdy taqta Shómishbai Sariev turǵan «Samal -2» shaǵynaýdanyndaǵy № 43 úidiń qabyrǵasyna ornatyldy.
Sharaǵa Almaty qalasy ákiminiń orynbasary Erjan Babaqumarov, ziialy qaýym ókilderi men aqynyń týǵan-týystary qatysty.
«Búgin erekshe tarihi kún. Qazaqtyń birtýar aqyny Shómishbai Sarievtyń turǵan úiinde eskertkish taqta ashyldy. Aqynnyń sózine jazylǵan ánder ár qazaqtyń júreginde máńgi saqtalady. Meniń repertýarymda Shómishbai aǵanyń sózine jazylǵan biraz án bar «Atameken» ánin erekshe atap ótkim keledi. Bul án keń baitaq qazaq dalasyna keńinen tanylǵan. Men óte baqyttymyn. Dúniejúziniń sahnasynda «Atameken» ánin oryndaǵanda kórermender kózderine jas alady. Ásirese, shet eldegi qazaqtardyń júregin eljiretti. Tipti, osy ánniń arqasynda atamekenine oralǵan qandastarymyzda bar. Shómishbai aǵanyń keremet óleńderi bar kezde, ol kisiniń esimi eshqashan óshpeidi», - dedi Qazaqstannyń halyq ártisi Roza Rymbaeva.
Aita keteiik, aqyn biyl 15 aqpan kúni 75 jasqa qaraǵan shaǵynda dúnieden ozdy.
Shómishbai Sariev 1946 jyly 15 sáýirde Qyzylorda oblysy, Aral aýdany, Shómish stansasynda dúniege kelgen. Eńbek jolyn Qazaly aýdandyq «Lenin týy», Aral aýdandyq «Tolqyn» gazetterinen bastaǵan. Keiinnen «Qazaqstan» baspasynyń redaktory, «Juldyz» jýrnaly bóliminiń meńgerýshisi, Qazaqstan Respýblikasy Ulttyq ǵylym akademiiasy Muhtar Áýezov atyndaǵy Ádebiet jáne óner institýtynyń ǵylymi, aǵa ǵylymi qyzmetkeri bolǵan.
1971 jyly QazMÝ-diń jýrnalistika fakýltetin bitirgen.
1996 jyly «Qazirgi qazaq lirikasynyń izdenisteri» atty taqyrypta ǵylym kandidaty dárejesin ielendi. «XX ǵasyrdyń jiyrmasynshy jyldardaǵy poeziiasy» atty monografiia jazǵan. Ómiriniń sońǵy jyldarynda M.O.Áýezov atyndaǵy Ádebiet jáne óner institýtynda ǵylymi qyzmetker boldy.
«Ǵashyqtar jyry», «Bozjorǵa» atty avtorlyq beinetaspasy jaryq kórdi. G.Gýlia, O.Berggolts, I.Abashidze, S.Vikýlov, A.Dementev, F.Alieva, R.Rojdestvenskii, M.Emineský, t.b. aqyndardyń óleńderin qazaq tiline aýdarǵan.
Alǵashqy jyr jinaǵy 1974 jyly «Baldáýren» degen atpen jaryq kórgen. Sodan bergi aralyqta qazaq, orys tilderinde on bes shaqty kitaby shyqty.
Qazaqstannyń eńbek sińirgen qairatkeri, birinshi dárejeli «Barys» jáne «Parasat» ordenderiniń igeri, «Frants Kafka atyndaǵy halyqaralyq Altyn Medal» syilyǵynyń laýreaty, «Platina Tarlan» syilyǵynyń laýreaty.
