Abai atyndaǵy Qazaq memlekettik akademiialyq opera jáne balet teatrynda «qazaq valsiniń koroli» Shámshi Qaldaiaqovtyń 90 jyldyǵyna arnalǵan «Shámshi álemi» atty kontsert ótti, dep habarlaidy QazAqparat.
Kontsert Abai atyndaǵy memlekettik opera jáne balet teatrynyń simfoniialyq orkestriniń súiemeldeýimen ótti. Dirijer - kompozitordyń uly Muhtar Qaldaiaqov boldy.
«Men óte baqyttymyn. Búgin men 15 jasar bala kezimdi esime túsirdim. Ákemniń 50 jasyna arnalǵan kontsertti osy teatrdyń amfiteatrynda tamashalaǵanmyn. Mine, odan beri 40 jyl ótipti. Al osy óner ordasyna dirijer bolyp kelgenime – 25 jyl. Búgin meniń balalarym sahnada óner kórsetti, óte qýanyshtymyn. Án keshine keler bolsam, biz baǵdarlama boiynsha Almaty qalasy ákiminiń estradalyq-simfoniialyq orkestriniń jetekshisi, QR Eńbek sińirgen óner qairatkeri Aleksandr Beliakovpen jáne belgili kompozitor Rinat Ǵaisinmen jumys istedik», - deidi Muhtar Qaldaiaqov.
Kórermen 50-60 jyldardaǵy Almatynyń retro atmosferasyna kýá boldy. Abai atyndaǵy memlekettik opera jáne balet teatrynyń úzdik solisteri kompozitordyń jiyrmadan astam ánin oryndady. Atap aitqanda «Ánim sen ediń», «Keshikpei kelem dep en», «Aq bantik», «Qaidasyń», «Baqyt qushaǵynda», «Meniń Qazaqstanym» jáne basqa ánder.
Abai atyndaǵy memlekettik akademiialyq opera jáne balet teatrynyń solisi Gúlzat Daýrbaeva stýdenttik shaǵynda Shámshi Qaldaiaqov atyndaǵy án festivaliniń laýreaty bolǵanyn aitty.
«Búgin men Shámshi aǵanyń eki ánin oryndadym. Kompozitor murasy árqaisymyzdyń júregimizde. Stýdent kezimde maǵan Shámshi aǵany kórý baqyty buiyrdy. Ol kisi maǵan batasyn bergen. Kompozitordyń 90 jyldyǵyna arnalǵan kontsertte halyqtyń júreginen máńgilik oryn alǵan ánder shyrqaldy. Onyń artynda talantty urpaq qalǵanyna qýanyshtymyn», - deidi ánshi.
Eske salaiyq, 15 tamyzda «qazaq valsiniń koroli» Shámshi Qaldaiaqovtyń týǵanyna 90 jyl toldy. Aty ańyzǵa ainalǵan sazgerdiń uly ákesi týraly syr shertken bolatyn.
Aita keteiik, kontsertte barlyq sanitarlyq talaptar saqtaldy.
