Almatydaǵy Respýblikalyq fizika-matematika mektebi (RFMM) direktorynyń mindetin atqarýshy Almas Ordabaev oqýshy qyzdyń ólimine qatysty pikir bildirdi. Onyń aitýynsha, qyz 2020 jyldyń 1 qyrkúieginen bastap RFMM-de oqidy, dep habarlady Tengrinews.kz agenttigi.
"Daryndy bala ekenin kórsetti, oqý mindetterine jaýapkershilikpen qarady, barlyq pán boiynsha "4" pen "5", jaratylystaný-ǵylymi pánder tsikline qabileti boldy. Sabaqtan sebepsiz qalmaityn, sabaqqa keshikken emes", - dedi Almas Ordabaev.
Onyń aitýynsha, oqýshy tabiǵatynan ustamdy, emotsiialyq turǵydan turaqty bala bolǵan. Synyptastarymen qarym-qatynasy qalypty jáne muǵalimdermen árqashan sypaiy, aqjarqyn, meiirimdi bolǵan.
Dúisenbi, 3 mamyrda oqýshy sabaqta bolǵan.
"Sol kúni synyptastarymen de, muǵalimderimen de janjal bolǵan joq. Oqýshy qyz ádettegidei júrdi. Sabaq bitken soń úiine qaitqan. 4 mamyrda tańerteń qyzdyń ákesi telefon soǵyp, qyz qaitys bolǵanyn habarlady. Mektep otbasyna jan-jaqty moraldyq qoldaý kórsetip jatyr", - dedi Ordabaev.
Sondai-aq, ol qyzdyń otbasy tolyqqandy ekenin atap ótti. Qyz ýniversitetke túsýdi josparlaǵan jáne mektebin jaqsy kórgen eken.
"9 synyp oqýshylary memlekettik emtihan tapsyrýy kerek bolatyn. Ol jaqsy oqydy, emtihan týraly alańdamady. Toǵyzynshy synyp oqýshylary tapsyratyn barlyq pán boiynsha ol óte jaqsy oqityn. Ol ýaiymdaityn balalar qatarynan emes, psihikasy turaqty qyz. Mektebimizde psihologtar oqýshylardyń mazasyzdyq deńgeiin esepke alady, al onda mundai belgiler múlde bolmaǵan. Sondyqtan, ózimiz de qazir qatty kúizelip qaldyq, ne bolǵanyn túsinbei otyrmyz. Politseiler anyqtap jatyr, olar kelip, muǵalimder men synyptastarynan ata-anasynyń kózinshe jaýap aldy", - dedi Almaty qalasy Respýblikalyq fizika-matematika mektebi (RFMM) direktorynyń mindetin atqarýshy Almas Ordabaev.
Almaty PD málimetinshe, oqiǵa 4 mamyrǵa qaraǵan túni Almaty qalasy Medeý aýdanynda bolǵan.
"Úi aýlasynda A. esimdi segizinshi synyp oqýshysy ózine qol jumsaǵan. Ol asylyp qalǵan. Sot-meditsinalyq saraptama taǵaiyndaldy", - dedi Almaty qalasy Politsiia departamentiniń baspasóz qyzmeti ókili.
Bul derek QR QK-nyń 105-baby boiynsha tergelip jatyr. Oqiǵanyń sebebi anyqtalýda.
