Búgin Almatyda Eýraziialyq úkimetaralyq keńes otyrysy aiasynda Qazaqstan Respýblikasynyń Premer-Ministri Baqytjan Saǵyntaev Armeniia Respýblikasynyń Premer-Ministri Karen Karapetianmen kezdesý ótkizdi, dep habarlaidy "Ult aqparat" Úkimet basshysynyń baspasóz qyzmetine silteme jasap.
Ótkizilgen kezdesýler barysynda taraptar tsifrlyq tehnologiialardy engizý jáne ortaq jobalardy iske asyrý salasyndaǵy ekijaqty ekonomikalyq yntymaqtastyq máselelerin talqylady.
Aita keteiik, 2017 jylǵy qańtar-qarashada Qazaqstan men Armeniia arasyndaǵy taýar ainalymy 5,4 mln dollardy qurady. Qazaqstannyń Armeniiaǵa eksporttaityn negizgi ónimderi – akkýmýliatorlar, kótergishter men domkrattar, motorly kólik quraldarynyń bólshekteri, munai gazdary men kómirsýtekter, sorǵylar. Búgin Qazaqstanda armian kapitalynyń qatysýymen 268 kásiporyn qyzmetterin tabysty iske asyryp keledi.
2017 jylǵy maýsymda «Erevan – Astana» reisiniń ashylýy biznes ortada jáne týrizm salasynda ózara is-qimyldy damytýǵa septigin tigizip keledi.
