QR Memlekettik syilyǵynyń laýreaty, «Alash», Reseidiń Sholohov atyndaǵy Halyqaralyq syilyǵynyń, «Parasat» ordeniniń iegeri, professor Sábit Dosanovtyń qurmetine arnalǵan shyǵarmashylyq kesh Abai atyndaǵy qazaq memlekettik akademiialyq opera jáne balet teatrynda ótti, – dep habarlaidy «Ult aqparat».
Keshke ziialy qaýym ókilderi, Almaty qalasynyń ákimi, jazýshynyń sheteldegi qalamdas dostary keldi. Saltanatty jiynda Almaty qalasynyń ákimi Baqytjan Saǵyntaev quttyqtaý sóz sóiledi. Ol Memleket basshysy Qasym-Jomart Toqaev pen Elbasy Nursultan Nazarbaevtyń joldaǵan quttyqtaýyn oqyp berdi.
«Qurmetti Sábit Aitmuhanuly! Sizdi 80 jasqa tolǵan mereitoiyńyzben quttyqtaimyn! Halqymyz ózińizdi qarymdy qalamger, qoǵamdyq-saiasi mańyzdy oqiǵalarǵa oi-pikirin bildirip otyratyn qairatker retinde jaqsy biledi.Uzaq jylǵy shyǵarmashylyq eńbegińiz óz jemisin berip keledi. Sizdiń qalamyńyzdan shyqqan kórkem dúnieler búgingi zamanmen úndestik taýyp, ǵasyrlar toǵysyndaǵy kókeikesti máselelerdi kóterýimen erekshelenedi. Aldaǵy ýaqytta da oqyrmandaryńyzdy tartymdy týyndylaryńyzben qýanta berýińizge tilektestigimdi bildiremin. Sizge zor densaýlyq, áýletińizge amandyq pen qut-bereke tileimin», – delingen Prezident Qasym-Jomart Toqaev joldaǵan jedelhatta.
Elbasy Nursultan Nazarbaevtyń quttyqtaý hatynda jazýshynyń oqyrmandar iltipaty men qurmetine bólenip, keń tynysty kesek týyndylarynyń ulttyq ádebiettiń, sonyń ishinde kórkem prozanyń órkendep, órisiniń keńeiýine eleýli úles qosqany aitylady.
Sonymen qatar, QR Parlamenti Májilisiniń Tóraǵasy Nurlan Nyǵmatýlin men QR Mádeniet jáne sport ministri Aqtoty Raiymqulova quttyqtaý hat joldady. Sondai-aq, jazýshyǵa Ressei, Ózbekstan, Armeniia, Ázerbaijan, Túrik, Qyrǵyzstan elderinen arnaiy kelgen belgili jazýshylar men jýrnalister jyly lebiz bildirdi.
