Almatyda sabaq oqytýdyń úsh nusqasy ázirlendi. Bul týraly brifing barysynda qalalyq bilim basqarmasynyń basshysy Lázzat Jylqybaeva aitty, dep habarlaidy QazAqparat.
Bilim basqarma basshysynyń aitýynsha, Almatyda jańa oqý jyly qatań sanitarlyq-epidemiologiialyq talaptardy saqtai otyryp, qalypty formatta bastalady. Bul rette 287 mektep 300 myńǵa jýyq oqýshyny qabyldaidy, onyń 30 myńy birinshi synyp oqýshysy. 68 myńnan astam stýdent 82 kolledjde oqýdy bastaidy.
Mektepke deiingi uiymdar qalypty jumysyna oraldy, qazirgi ýaqytta 860 balabaqsha men shaǵyn ortalyqta 69 myńnan astam bala bar.
Lázzat Jylqybaeva barlyq bilim berý uiymdary Ashyq jobasyna qosylǵanyn jáne qajetti mólsherde jýǵysh, dezinfektsiia jáne antiseptik quraldarmen qamtamasyz etilgenin jetkizdi.
«1 qyrkúiekten bastap bilim berý mekemelerinde sanitarlyq talaptardyń saqtalýyna turaqty baqylaý júrgiziledi, onyń ishinde temperatýrany ólsheý, vizýaldy tekserý, jeldetý rejimderi, kvarts, ylǵaldy tazalaý jáne basqa da sharalar. Ruqsat etilmegen adamdardyń kirýine tyiym salynady jáne buqaralyq is-sharalar bolmaidy», - dedi basqarma basshysy.
Spiker qaladaǵy qazirgi epidemiologiialyq jaǵdaidy eskere otyryp, oqý protsesi qalai uiymdastyrylatyny týraly aitty.
«Almaty «qoiý qyzyl» aimaqta tur. Osyǵan bailanysty, bilim berýdi uiymdastyrýda oqýshylardyń ózdiginen kelýin boldyrmaý jáne balalar arasynda infektsiianyń taralý qaýpin azaitý maqsatynda oqý protsesi bir mezgilde úsh baǵytta júretin bolady. Birinshiden, oqýshylarǵa ata-analarynyń ótinishi negizinde onlain oqytý uiymdastyrylady. Osylaisha, ata-analarǵa balasyn mektepke berýdi nemese oqýdy qashyqtan jalǵastyrýdy tańdaý quqyǵy beriledi», - dedi L. Jylqybaeva.
Ekinshiden, aralas oqytý kózdelgen. Osy oraida negizgi oqý pánderi mektepte, qalǵandary - onlain formatta (mýzyka, kórkem eńbek, informatika, quqyq negizderi, grafika jáne jobalaý, kásipkerlik jáne biznes negizderi) oqytylady.
Úshinshiden, oflain oqytý negizinen 1-5 synyptardy, bitirýshi 9-11 synyp oqýshysyn qamtidy jáne synyptarda oqýshy sany 25 adamnan aspaidy. Osylaisha, bilim basqarmasy dástúrli bilim berý formatyna kezeń-kezeńmen kóshýdi qamtamasyz etýdi josparlap otyr.
Spiker búginde muǵalimder men ata-analar arasynda qajetti túsindirý jumystary júrgizilip jatqanyn aitty.
Barlyq suraqtar boiynsha oqýshylardyń ata-analary mektep ákimshiligine nemese tikelei bilim basqarmasyna habarlasa alady.
