Megapoliste koronavirýsty anyqtaityn PTR-testileýdiń taǵy eki jekemenshik zerthanasy ashylady. Onyń biri erteńnen bastap jumysqa kirisedi. Bul týraly Baqytjan Saǵyntaev málim etti, dep habarlaidy QazAqparat.
«Osydan 10 kún buryn jeke zerthanalarda reagentter bitip qalýyna bailanysty qiyndyq týyndady. Onyń sebebi túsinikti, test tapsyrǵysy keletin adamdardyń sany artty. Sonymen qatar, Ulttyq saraptama ortalyǵy filialynyń zerthanasynda 30-ǵa jýyq qyzmetkerden koronavirýs anyqtaldy. Sol sebepti jumysty toqtata turýǵa májbúr boldyq. Qazir barlyq zerthanalar tolyǵymen jumys istep tur», - dedi ákim.
Sonymen qatar, ol taǵy eki zerthana ashylatynyn aitty.
«Erteńnen bastap Almaty qalalyq jedel shuǵyl kómek kórsetý aýrýhanasynyń janynan jeke zerthana ashylady. Sondai-aq, jaqyn arada jekemenshik klinikalardyń birinde taǵy bir zerthana ashylatyn bolady. Biz halyqtyń testileý deńgeiin ózimiz qoiǵan mindetterge jetkizemiz», - dedi Baqytjan Saǵyntaev.
Qala basshysynyń aitýynsha, búgingi tańda 300 myńǵa jýyq test júrgizildi. Onyń 245 myńy PTR testi.
