Revaktsinatsiia - eki vaktsinadan soń, bizdiń aǵzamyzdy koronavirýsqa qarsy ary qarai immýnitetti qalyptastyrý úshin salynady.
Bul týraly №14 qalalyq emhananyń jalpy praktika bólimshesiniń meńgerýshisi Roza Bekbaeva onlain-suhbat barysynda aitty, dep habarlaidy QazAqparat.
Dáriger aldymen vaktsinalaýǵa kimderdiń qarsy kórsetilimi bar ekenin aitty.
«Vaktsinalaý aýyr onkologiialyq aýrýmen aýyratyn jáne dári-dármekterge aýyr allergiialyq reaktsiiasy bar adamdarǵa qarsy kórsetilgen. Biz vaktsina salmas buryn osynyń bárin eskeremiz. Iaǵni, eń aldymen mindetti tekserý, analiz jinaý, saýalnama júrgizgen soń ǵana vaktsina salamyz. Aita keteiin, aýyr allergiialyq reaktsiia vaktsinalaýdyń negizgi qarsy kórsetilimi bolyp tabylady»,- dedi emhana meńgerýshisi.
Onyń aitýynsha, qazirgi tańda emhanada Pfizer vaktsinasyn saldyrǵysy keletinder óte kóp.
«Men oilaimyn, eger Pfizer vaktsinasynyń alǵashqy partiiasy bitse, taǵy jetkizilimi bolady dep, sebebi, qazirgi ýaqytta bul vaktsinaǵa suranys joǵary. Tipti, qart adamdar kelip Pfizer vaktsinasy jaily surap jatady»,- dedi dáriger.
Dáriger jasóspirimderdi vaktsinalaýdyń mańyzdylyǵy men egilýden keiingi qalypty jaǵdailardy eske saldy.
«Jasy 12-den joǵary balalar aýrýdy tasymaldaýshy bolýy múmkin. Sebebi, 12-18 jas aralǵyndaǵy jasóspirimder adamdar kóp jinalatyn oryndarǵa, mektepterge, túrli úiirmelerge barady. Sondyqtan ózderi aýyrmas úshin jáne ainalasyndaǵylar da juqtyrmas úshin olardy vaktsinalaý durys».
«Egilýden keiingi qalypty jaǵdai bolyp, dene qyzýynyń kóterilýi, azdaǵan diril, múmkin búkil deneniń aýrýy bolyp tabylady. Biraq, bul belgiler ádette úsh kúnnen aspaidy. Bizdiń emhanada men ózim baiqaǵandai, vaktsina alǵan adamdarda bul belgiler eki kúnnen artyq sozylǵan joq jáne aýyr asqynýlar bolǵan joq», - dedi Roza Bekbaeva.
Sondai-aq, onyń aitýynsha, qazirgi ýaqytta emhanaǵa júkti áielder de Pfizer vaktsinasyn saldyrýǵa kelip jatyr.
«Júkti áielder vaktsinany 16 apta men 37 apta aralyǵynda saldyrady. Biz olardy qadaǵalaimyz. Aldymen vaktsina saldyrmas buryn olardyń analizin jinaidy, vaktsina saldyrǵan soń, jarty saǵat emhanada bolady. Kelesi úsh kún boiy biz olarmen tyǵyz bailanysta bolamyz»,-dedi dáriger.
Roza Bekbaevanyń aitýynsha, qazirgi tańda №14 qalalyq emhanasyna 34 800 adam tirkelgen. Onyń 15 000-i balalar, 1-shi jáne 2-shi vaktsina alǵandar sany 15 283. 6 ai ótken soń, úshinshi vaktsinany – 1022 adam alǵan.
