Almatyda «Uly dalanyń ultaralyq tili» atty I respýblikalyq kongress barysynda ózge ult ókilderi til úirený tájiribesimen bólisti, dep habarlaidy "Ult aqparat".
Búgingi oflain kezdesýge memlekettik tildi erkin meńgergen 14 etnos ókili qatysty. Olardyń arasynda orys, ázerbaijan, belarýs, armian, nemis, ýkrain, sheshen, kúrd, uiǵyr ultynyń jastary bar. Shara memlekettik tilde ótti.
Qazaqstan halqy Assambleiasynyń múshesi Nargizam Mahmýdovanyń aitýynsha, memlekettik tildi úiretý balabaqshadan bastalýy tiis.
«Meniń oiymsha, qazirgi tańda Qazaqstanda ómir súretin árbir azamat pen azamatshanyń memlekettik tildi bilýi – paryz dep esepteimin. Qai ult bolmasyn, memlekettik tildi bilýi asa mańyzdy. Memlekettik tildi damytý besikten desek, balabaqshada memlekettik tildi damytýǵa asa mán berilýi qajet. Sonyń nátijesinde ol eseiip, memlekettik qyzmetke kirisken sátinde qazaq tilin meńgerýden qiyndyq kórmeitini sózsiz. Olardyń mártebesi de ústem bolatyny anyq», – deidi Nargizam Mahmýdova.
Jiynǵa qatysýshy Elnara Tashanovanyń pikirinshe, til meńgerýde arnaiy ádistemelik toptama ázirleý qajet.
«Qazirgi tehnika damý zamanynda ártúrli taqyryp aiasynda chat-bottar men marafondar uiymdastyrylýda. Osy júiede til tóńireginde de onlain toptar uiymdastyryp, adamdardy qyzyqtyrsa, qazaq tilin úirenýge de qyzyǵýshylyq pen suranys óser edi . Biraq, tildi meńgergen deńgeii ártúrli bolǵandyqtan, kishkene qiynshylyqtar týyp jatady. Sondyqtan, meniń oiymsha qazaq tilin oqytýda tildi meńgerý deńgeiine bólý kerek shyǵar. Sonda ár deńgeidegi adamdarǵa belgili bir ádistemelik ustanymdar daiyndaýǵa jeńilirek bolar edi. Máselen aǵylshyn tilin meńgergendigin A1, A2B V1, V2,S1, S2 deńgeileri arqyly kórsetiledi, osy júiede jumys jasasaq bolady.Qazaq tilin úirenýge jáne sol tilde oqytýǵa keletin bolsaq, tilimizdiń grammatikasyn, leksikasyn jáne orfografiiasyn damytýǵa arnalǵan birynǵai jol bolmaǵandyqtan, osy til oqý turǵysynan kúrdeli qabyldanady»,– deidi Elnara Tashanova.
Kongresste árbir qatysýshy ózin tanystyryp, qazaq tilin úirenýge qatysty oilaryn kezekpen ortaǵa saldy.
